បារាំងទាមទារឲ្យតុលាការពិន័យធនាគារមួយនៅស្វីសជិត២ពាន់លានដុល្លារអាមេរិក ពាក់ព័ន្ធការបន្លំពន្ធ
ប្រទេសបារាំង កាលពីថ្ងៃពុធម្សិលមិញ បានជំរុញឲ្យតុលាការក្រុងប៉ារីសពិន័យធនាគារស្វីស UBS ១.៦ពាន់លានអឺរ៉ូ ឬ ១.៨ពាន់លានដុល្លារអាមេរិក ដោយចោទថា ធនាគារ UBS នេះបានជួយដល់អតិថិជនរបស់ខ្លួនបន្លំពន្ធ។
ធនាគារយក្សនៅប្រទេសស្វីសមួយនេះបានប្រឈមនឹងការកាត់ក្តីនៅប៉ារីស ចាប់តាំងពីដើមខែតុលាមក ពោលគឺក្រោយពេលដែលមានការស៊ើបអង្កេត៦ឆ្នាំ ដែលចោទថា UBS និងសាខានៅបារាំងរបស់ខ្លួនថា បើកឲ្យមានប្រតិបត្តិការបន្លំពន្ធ ពីឆ្នាំ២០០៤ដល់២០១២ ។ យ៉ាងណាក៏ដោយ UBS បានបដិសេធចំពោះការចោទប្រកាន់នេះ។
លោក Xavier Normand-Bodard មេធាវីម្នាក់តំណាងឲ្យបារាមងបានថ្ងៃពុធ បានស្នើដល់តុលាការដាក់ទណ្ឌកម្មលើធនាគារ ដែលធ្វើពុតជាមិនដឹងពីពលរដ្ឋបារាំងបានលាក់ទ្រព្យសម្បត្តិនៅស្វីស តាមរយៈការបន្លំពន្ធបំពានលើអាជ្ញាធរពន្ធដារបស់បារាំង។
សូមរម្លឹកថា UBS ត្រូវបានរកឃើញរួចមកហើយថា មានកំហុសលើការឃុបឃិតជួយឲ្យអតិថិជនប្រមាណ២ម៉ឺននាក់ បានលាក់លុយរាប់ពាន់លានដុល្លារអាមេរិក ពីអាជ្ញាធរអាមេរិក ចាប់ពីឆ្នាំ២០០២ និង ២០០៧ ។ ធនាគារនេះបានចំណាយ៧៨០លានដុល្លារអាមេរិក ដើម្បីដោះស្រាយបញ្ហានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។