ប្រមុខរាជរដ្ឋាភិបាលនឹងដឹកនាំគណៈប្រតិភូជាន់ខ្ពស់កម្ពុជាទៅចូលរួមប្រជុំកំពូលអាស៊ានលើកទី៣៣ នៅប្រទេសសឹង្ហបុរី
តបតាមការអញ្ជើញរបស់ ឯកឧត្តម លី សៀនឡុង នាយករដ្ឋមន្រ្តី នៃប្រទេសសឹង្ហបុរី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់ទៅចូលរួម
កិច្ចប្រជុំកំពូលអាស៊ានលើកទី៣៣ និងកិច្ចប្រជុំកំពូលពាក់ព័ន្ធដែលនឹងប្រព្រឹត្តទៅក្រោមមូលបទ «ភាពរឹងមាំ និងនវានុវត្តន៍របស់អាស៊ាន» ពីថ្ងៃទី១៣ ដល់ថ្ងៃទី១៥ ខែវិច្ឆិកា ឆ្នាំ២០១៨ នៅប្រទេសសឹង្ហបុរី។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា នៅអំឡុងកិច្ចប្រជុំអាស៊ានក្នុងប្រទេសសឹង្ហបុរីនោះ សម្តេចតេជោនឹងចូលរួមកិច្ចប្រជុំជាច្រើនទៀត ដូចជា កិច្ចប្រជុំក្រៅផ្លូវការអាស៊ាន-អូស្រ្តាលី, កិច្ចប្រជុំអាស៊ាន-ចិនលើកទី២១, កិច្ចប្រជុំអាស៊ាន-សាធារណរដ្ឋកូរ៉េលើកទី២០, កិច្ចប្រជុំអាស៊ាន-រុស្ស៊ី លើកទី៣, កិច្ចប្រជុំអាស៊ាន-ជប៉ុន លើកទី២១, កិច្ចប្រជុំក្រៅផ្លូវការអាស៊ាន-ឥណ្ឌា, កិច្ចប្រជុំអាស៊ាន-សហរដ្ឋអាមេរិក លើកទី៦, កិច្ចប្រជុំកំពូលអាស៊ានបូកបី លើកទី២១, កិច្ចប្រជុំកំពូលអាស៊ីបូព៌ា និងកិច្ចប្រជុំថ្នាក់ដឹកនាំ នៃភាពជាដៃគូសេដ្ឋកិច្ចទូលំទូលាយក្នុងតំបន់លើកទី២។
ជាមួយគ្នានេះដែរ សម្តេចតេជោ ក៏នឹងចូលរួមក្នុងកម្មវិធីមួយចំនួនទៀត ដូចជា កិច្ចប្រជុំជាមួយក្រុមប្រឹក្សាពិគ្រោះយោបល់ធុរកិច្ចអាស៊ាន, កម្មវិធីអាហារងារងារថ្ងៃត្រង់រៀបចំដោយ ឯកឧត្តម លី សៀនឡុង សម្រាប់ថ្នាក់ដឹកនាំអាស៊ាន និងពិធីលៀងសាយភោជន រៀបចំដោយប្រធានកិច្ចប្រជុំសម្រាប់ថ្នាក់ដឹកនាំអាស៊ាន។
ក្នុងអំឡុងពេលស្នាក់នៅប្រទេសសិង្ហបុរី សម្តេចតេជោនាយករដ្ឋមន្រ្តី នឹងមានជំនួបទ្វេភាគីជាមួយប្រមុខគណៈប្រតិភូ នៃប្រទេសមួយចំនួនផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។