ប្រធានសហព័ន្ធបាល់ទះ កោតសរសើរក្រុមបាល់ទះឈ្នះមេដាយសំរឹទ្ធ ស៊ីហ្គេម
ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានសហព័ន្ធកីឡាបាល់ទះកម្ពុជាបានអញ្ជើញផ្តល់ការលើកទឹកចិត្តជូនដល់ក្រុមបាល់ទះជម្រើសជាតិកម្ពុជា នៅមជ្ឈមណ្ឌលជាតិហ្វឹកហ្វឺនកីឡា បន្ទាប់ពីដណ្តើមបានមេដាយសំរឹទ្ធជាប្រវត្តិសាស្ត្រពីព្រឹត្តិការណ៍កីឡាស៊ីហ្គេម លើកទី៣១ នៅទីក្រុងហាណូយ ប្រទេសវៀតណាម។
ឯកឧត្តមប្រធានសហព័ន្ធកីឡាបាល់ទះកម្ពុជាសម្តែងនូវក្តីរីករាយជាខ្លាំង ដែលក្រុមបាល់ទះកម្ពុជាដណ្តើមបានមេដាយជាប្រវត្តិដំបូងជូនជាតិ នាពេលនេះ។ ឯកឧត្តមចាត់ទុកថា ក្នុងនាមប្រធានសហព័ន្ធផង ក្នុងនាមរាជរដ្ឋាភិបាល សម្តេចតេជោ ហ៊ុន សែន និងក្នុងនាមប្រជាពលរដ្ឋខ្មែរសូមកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងអស់ពីសមត្ថភាពរបស់ក្រុមបាល់ទះកម្ពុជា ដែលដណ្តើមបានកិត្តិយសដ៏ធំធេងជូនជាតិ ក្នុងស៊ីហ្គេម ឆ្នាំ២០២២នេះ។
ឯកឧត្តមនាយឧត្តមសេនីយ៍សន្តិបណ្ឌិត នេត សាវឿន ចាត់ទុកថា នេះគឺជាជោគជ័យដ៏ធំមួយ និងជាជំហានទី១ ក្នុងប្រវត្តិសាស្ត្រចូលរួមប្រកួតកីឡាស៊ីហ្គេម នាពេលកន្លងមក។
ជាមួយគ្នានោះ ឯកឧត្តមក៏បានជំរុញឲ្យក្រុមជំនាញបច្ចេកទេសសហព័ន្ធរៀបចំពង្រឹងក្រុមបាល់ទះបុរសឲ្យកាន់តែល្អប្រសើរបន្ថែមទៀត ជាពិសេសគឺកំណត់ជាគោលការណ៍បង្កើតឲ្យមានក្រុមបាល់ទះជម្រើសជាតិនារីផងដែរ សម្រាប់ត្រៀមលក្ខណៈរៀបចំទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា។
ឯកឧត្តមសង្កត់ធ្ងន់ថា ក្រុមបាល់ទះជម្រើសជាតិនារីត្រូវរៀបចំបង្កើតឲ្យបានភ្លាមៗ និងទាន់ពេលវេលា ដើម្បីត្រៀមប្រកួត ស៊ីហ្គេម ២០២៣ ដោយថ្នាក់ដឹកនាំសហព័ន្ធនឹងផ្តល់ការគាំទ្រគ្រប់បែបយ៉ាងទាំងអស់ ដើម្បីរួមគ្នារៀបចំឲ្យបានក្រុមបាល់ទះនារី ខណៈទីលានក៏ត្រូវបានជំរុញឲ្យរៀបចំភ្លាមៗដូចគ្នាផងដែរ។
ជាមួយគ្នានោះ ឯកឧត្តមក៏បានប្តេជ្ញាចិត្តរួមគ្នា ទាំងថ្នាក់ដឹកនាំ គ្រូបង្វឹក កីឡាករ និងមន្ត្រីបច្ចេកទេស ដើម្បីបន្តការកសាងវិស័យកីឡាបាល់ទះកម្ពុជាឲ្យកាន់តែរីកចម្រើន ឆ្ពោះទៅធ្វើម្ចាស់ផ្ទះ ស៊ីហ្គេម ២០២៣ ប្រកបដោយក្តីសង្ឃឹម និងជឿជាក់ផងដែរ។
គួររំឭកថា ក្រុមបាល់ទះកម្ពុជា ដែលដណ្តើមបានមេដាយសំរឹទ្ធ ក្នុងស៊ីហ្គេម លើកទី៣១ ឆ្នាំ២០២២ នៅក្រុងហាណូយ ប្រទេសវៀតណាមនេះ គឺក្រោយពីបានយកឈ្នះក្រុមជម្រើសជាតិ ដែលជាម្ចាស់មេដាយមាសស៊ីហ្គេម ៨ជំនាន់ នៅក្នុងការប្រកួតដណ្តើមចំណាត់ថ្នាក់លេខ៣ ក្នុងលទ្ធផល ៣សិតទល់២សិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។