ស្ពានឈើមួយកន្លែងនៅក្នុងស្រុកភ្នំក្រវាញត្រូវបានបំផ្លាញ ក្រោយរថយន្តធុនធំដឹកឬស្សីឆ្លងកាត់
ស្ពានឈើមួយកន្លែងស្ថិតនៅក្នុងភូមិស្សេត្របុរី ឃុំសន្រ្ទែ ស្រុកភ្នំក្រវាញ បានបាក់កាលពីព្រលប់ថ្ងៃទី១០ ខែសីហា ឆ្នាំ២០២២ ក្រោយពីរថយន្តធុនធំមួយគ្រឿងដែលដឹកឬស្សីឆ្លងកាត់។
រថយន្តធុនធំដឹកឬស្សីដែលបណ្តាលឱ្យបាក់ស្ពាននេះ ម៉ាកហ៊ីយ៉ាន់ដាយ ពណ៌ស ទម្ងន់៥តោន ពាក់ស្លាកលេខ បាត់ដំបង 3A-3291 បើបរដោយឈ្មោះ ចាន់ណាន រស់នៅភូមិល្វាលួង ឃុំព្រែកលួង ស្រុកេកភ្នំ ខេត្តបាត់ដំបង។
បើតាមអ្នកបើកបរបានឱ្យដឹងថា ខ្លួនគេស៊ីឈ្នួលថៅកែនៅខេត្តបាត់ដំបងដើម្បីដឹកឬស្សីពីស្រុកភ្នំក្រវាញនេះ ហើយស្ពានដែលបាក់នេះ ខ្លួនបានបើកឆ្លងកាត់ម្តងរួចមកហើយប៉ុន្តែមិនអីនោះទេ ស្រាប់តែពេលនេះ ក៏បាក់បណ្តាលឱ្យរថយន្តក្រឡាប់ផ្ញាជើងតែម្តង។
យ៉ាងណាក៏ដោយ ចំពោះករណីនេះ សមត្ថកិច្ចស្រុកភ្នំក្រវាញបានចុះធ្វើការត្រួតពិនិត្យ និងបានឃាត់ទុករថយន្តបង្កឱ្យទទួលខុសត្រូវសង់ស្ពាននោះឡើងវិញ៕
ដោយ៖ ជា រ៉ានី
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។