ការដ្ឋានបូមខ្សាច់មួយកន្លែងនៅស្រុកកណ្តាលស្ទឹង កំពុងធ្វើសកម្មភាពដោយគ្មានច្បាប់ ផ្គើនអាជ្ញាធរ និងក្រសួងរ៉ែ និងថាមពល
(កណ្តាល) ៖ អាជីវកម្មជីកកាយយកខ្សាច់មួយកន្លែងស្ថិតក្នុងភូមិត្រស់ ឃុំទ្រា ស្រុកកណ្ដាលស្ទឹង ដែលត្រូវបានរដ្ឋបាលស្រុកកណ្តាលស្ទឹងចេញសេចក្តីជូនដំណឹងឱ្យផ្អាកសកម្មភាព ដោយរង់ចាំលិខិតអនុញ្ញាតពីក្រសួងរ៉ែ និងថាមពលនោះ ពេលនេះនៅតែដំណើរការ ដោយកំពុងតែផ្គើននឹងអាជ្ញាធរ។
បើយោងតាមសេចក្តីជូនដំណឹងរបស់រដ្ឋបាលស្រុកកណ្តាលស្ទឹង ចុះថ្ងៃទី២៩ ខែកញ្ញា ឆ្នាំ២០២២ បានប្រាប់ទៅដល់ម្ចាស់អាជីវកម្មជីកអាចម៌ដីឈ្មោះ ឡាយ គួន ស្ថិតនៅភូមិត្រស់ ឃុំទ្រា ស្រុកកណ្តាលស្ទឹង ឱ្យផ្អាកអាជីវកម្ម ព្រោះតែអាជ្ញាប័ណ្ណស្នើសុំអាជីវកម្ម នៅមិនទាន់ទទួលបានការអនុញ្ញាតពីក្រសួងរ៉ែ និងថាមពលនៅឡើយ ប៉ុន្តែមកទល់នឹងពេលនេះ ទីតាំងជីកយកអាចម៌ដីនោះនៅតែដំណើរការ។
ចំពោះករណីនេះ លោក អ៊ួច សាវឿន អភិបាលស្រុកកណ្តាលស្ទឹងបានថ្លែងថា ទង្វើបែបនេះគឺខុសនឹងច្បាប់ដោយធ្វើសកម្មភាពមិនទាន់មានលិខិតអនុញ្ញាតណាជាបទដ្ឋានត្រឹមត្រូវ។ ប៉ុន្តែយ៉ាងណាក៏ដោយ លោកអភិបាលស្រុកមិនបានប្រាប់ទេថា នឹងត្រូវចាត់វិធានការយ៉ាងម៉េចនោះទេ។
នៅថ្ងៃនេះ យើងនៅមិនទាន់អាចទាក់ទងសុំការបំភ្លឺពីមន្ទីររ៉ែ និងថាមពលខេត្តកណ្តាលបាននៅឡើយទេ តែគេរំពឹងថា អាជ្ញាធរពាក់ព័ន្ធនឹងចាត់វិធានការចំពោះទីតាំងជីកយកអាចម៌ដីដែលគ្មានច្បាប់នេះ ព្រោះថា សកម្មភាពនេះកំពុងធ្វើឱ្យខូចខាតធនធានក្រោមដី និងក៏កំពុងតែបំបាត់ចំណូលជាតិ ចូលទៅក្នុងហោប៉ៅឯកជនផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។