កម្ពុជា នៅសល់ផ្ទៃដីសង្ស័យមានមីន ៥៨៧គីឡូម៉ែត្រក្រឡាទៀត នឹងត្រូវបញ្ចប់ឲ្យអស់ត្រឹមឆ្នាំ២០២៥
កាលពីថ្ងៃទី០៣ ខែមករា ឆ្នាំ២០២៣ នៅទីស្នាក់អាជ្ញាធរមីន ឯកឧត្ដម ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានទទួលជួបពិភាក្សាការងារជាមួយ ឯកឧត្តម Pablo Kang ឯកអគ្គរដ្ឋទូតអូស្រា្តលី មុននឹងចប់បេសកកម្មការទូតនៅកម្ពុជា។
ក្នុងនាមរាជរដ្ឋាភិបាលកម្ពុជា ឯកឧត្តម ទេសរដ្ឋមន្ត្រី បានវាយតម្លៃខ្ពស់ចំពោះទំនាក់ទំនងយ៉ាងជិតស្និទ្ធរវាងប្រទេស និងប្រជាជនទាំងពីរ ព្រមទាំងថ្លែងអំណរគុណយ៉ាងជ្រាលជ្រៅជូនចំពោះរដ្ឋាភិបាល និងប្រជាជនអូស្ត្រាលី ដែលបានចូលរួមក្នុងការស្វែងរកសុខសន្តិភាព និងការអភិវឌ្ឍនៅកម្ពុជា ចាប់តាំងពីឆ្នាំ១៩៩២ ក៏ដូចជាចូលរួមដល់ការងារបោសសម្អាតមីនមនុស្សធម៌នៅកម្ពុជាចាប់តាំងពីឆ្នាំ១៩៩៤។
ចាប់តាំងពីឆ្នាំ១៩៩៤ អូស្ត្រាលី បានចូលរួមដល់ការងារបោសសម្អាតមីនមនុស្សធម៌នៅកម្ពុជាយ៉ាងសកម្ម និងបានផ្តល់ជំនួយជាង ១០០ លានដុល្លារអាមេរិក ដោយរំដោះបាននូវផ្ទៃដីប្រមាណជា ២៥០ គីឡូម៉ែត្រក្រឡា សម្រាប់ផ្តល់សុខសុវត្ថិភាព និងលើកកម្ពស់ជីវភាពរបស់នៅជូនដល់ប្រជាជនកម្ពុជានៅតាមមូលដ្ឋានប្រមាណជាង ១លាននាក់។
ឯកឧត្តម ទេសរដ្ឋមន្ត្រី បានចាត់ទុកប្រទេសអូស្ត្រាលីគឺជាដៃគូមួយយ៉ាងសំខាន់ក្នុងការងារបោសសម្អាតមីន ព្រមទាំងបានស្នើសុំឲ្យរដ្ឋាភិបាលអូស្រា្តលី បន្តបន្ថែមថវិកាជួយដល់កម្ពុជា ដើម្បីបញ្ចប់ការងារបោសសម្អាតមីននៅឆ្នាំ២០២៥ និងជួយដោះស្រាយហានិភ័យពីសំណល់ជាតិផ្ទុះពីសង្គ្រាមក្រោយឆ្នាំ២០២៥ ផងដែរ។
ជាមួយគ្នានេះ ឯកឧត្តម ទេសរដ្ឋមន្ត្រី បានជម្រាបប្រាប់ឯកអគ្គរដ្ឋទូតអូស្ត្រាលីអំពីរបត់ការងារបោសសម្អាតមីនក្នុងឆ្នាំ២០២២នេះ ដែលមានវិស័យឯកជន និងសប្បុរសជននានាជាច្រើនបានចូលរួមវិភាគទានជាមួយចលនាជាតិរបស់សម្តេចតេជោនាយករដ្ឋមន្ត្រី ដើម្បីដោះស្រាយបញ្ហាមីននៅកម្ពុជា តាមរយៈគម្រោងសម្តេចតេជោសម្រាប់សកម្មភាពមីន “ផ្តល់ដីសុវត្ថិភាព បង្កើតស្នាមញញឹម” ដែលអាជ្ញាធរមីនបានយកវិភាគទានទាំងនេះ ទៅធ្វើការផ្ទៃដីមានមីនបានជាង ៩១គីឡូម៉ែត្រក្រឡា។
បន្ទាប់ពីបញ្ចប់ការងារបោសសម្អាតមីនក្នុងគម្រោងសម្តេចតេជោសម្រាប់សកម្មភាពមីនទាំងស្រុង កម្ពុជានៅសល់ផ្ទៃដីសង្ស័យមានមីនប្រមាណជា ៥៨៧ គីឡូម៉ែត្រក្រឡាទៀត ដែលមានកម្ពុជាមានមហិច្ឆតាត្រូវបញ្ចប់ឲ្យអស់ត្រឹមឆ្នាំ២០២៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។