បង្ក្រាបគ្រឿងញៀនជិត ៥គីឡូក្រាម និងសារធាតុគីមីជាង ៤០គីឡូក្រាម ឃាត់ខ្លួនជនជាតិចិនម្នាក់
ភ្នំពេញ៖ កម្លាំងមន្ទីរប្រឆាំងបទល្មើសគ្រឿងញៀន នៃអគ្គស្នងការដ្ឋាននគរបាលជាតិ បានបើកប្រតិបត្តិការបង្ក្រាបបទល្មើសគ្រឿងញៀន ដោយចាប់ខ្លួនជនសង្ស័យជាជនជាតិចិនម្នាក់ រឹបអូសថ្នាំញៀនជិត ៥គីឡូក្រាម និងសារធាតុគីមីជាង ៤០គីឡូក្រាម រួមទាំងសារធាតុមិនច្បាស់ជាង ៥៣គីឡូក្រាមផ្សេងទៀត នៅរាជធានីភ្នំពេញ។
របាយការណ៍របស់មន្ទីរប្រឆាំងបទល្មើសគ្រឿងញៀន ដែលទទួលបាននៅថ្ងៃទី១៨ ខែឧសភា ឆ្នាំ២០២៣នេះ បានឲ្យដឹងថា ប្រតិបត្តិការនេះធ្វើឡើងនៅថ្ងៃទី១៤ ខែឧសភា ឆ្នាំ២០២៣ នៅចំណុចផ្ទះលេខ៣៧ ភូមិតិក្ខៈបញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដោយជនសង្ស័យមានឈ្មោះ ចូវ គ័រឆាវ ភេទប្រុស ជនជាតិចិន។
ដោយឡែក សម្រាប់វត្ថុតាងដែលដកហូតបានរួមមាន៖ មេតំហ្វេតាមីន ទម្ងន់៤គីឡូក្រាម ៦៨៤ក្រាម, សារធាតុគីមីផ្សំទម្ងន់ ៣គីឡូក្រាម, សារធាតុគីមី ៤០គីឡូក្រាម និងសារធាតុមិនច្បាស់ទម្ងន់ ៥៣គីឡូក្រាម ៤២៨ក្រាម។
បច្ចុប្បន្នជនសង្ស័យ រួមជាមួយវត្ថុតាង ត្រូវបានកម្លាំងជំនាញនៃមន្ទីរប្រឆាំបទល្មើសគ្រឿងញៀន កសាងសំណុំរឿង បញ្ជូនទៅសាលាដំបូងរាជធានីភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។