មនុស្ស៤នាក់ដែលញុះញង់ឱ្យបំផ្លាញសន្លឹកឆ្នោតត្រូវ គ.ជ.ប សម្រេចលប់ឈ្មោះចេញពីបញ្ជីបោះឆ្នោត និងពិន័យពី១០ទៅ១៥លានរៀល
ក្រុមប្រឹក្សាជំនុំជម្រុះ នៃគណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចតម្កល់សេចក្តីសម្រេចរបស់ក្រុមប្រឹក្សាជំនុំជម្រុះនៃគណៈកម្មការរៀបចំការបោះឆ្នោតរាជធានី-ខេត្ត លើសំណុំរឿងលេខ០០១, លេខ០០២, លេខ ០០៣, លេខ០០៤ និងលេខ០០៥ ដោយ គ.ជ.ប សម្រេចលុបឈ្មោះបុគ្គល៤នាក់ចេញពីបញ្ជីបោះឆ្នោតរយៈពេល៥ទៅ១០ឆ្នាំ និងពិន័យម្នាក់ៗពី១០ទៅ១៥លានរៀល ពាក់ព័ន្ធនឹងការញុះញង់ឱ្យបំផ្លាញសន្លឹកឆ្នោត។
លោក ប្រាជ្ញ ចន្ទ ប្រធាន គ.ជ.ប ជាប្រធានក្រុមប្រឹក្សាជំនុំជម្រុះ បានអានសេចក្តីសម្រេចលើសំណុំរឿងលេខ០០១ មានដើមបណ្តឹងឈ្មោះ លី ម៉េងហាំង នៅខេត្តត្បូងឃ្មុំ និងសំណុំរឿងលេខ០០៣ មានដើមបណ្តឹងឈ្មោះ ស៊ុន សុភា ភេទស្រី នៅខេត្តប៉ៃលិន ដោយក្រុមប្រឹក្សាជំនុំជម្រុះ គ.ជ.ប បានសម្រេចតម្កល់ និងពិន័យប្រាក់ក្នុងម្នាក់ៗចំនួន ១០លានរៀល ព្រមទាំងលុបឈ្មោះចេញពីបញ្ជីបោះឆ្នោត និងដកសិទ្ធិឱ្យឈរឈ្មោះឱ្យគេបោះឆ្នោត រយៈពេល១០ឆ្នាំ ដោយមិនគិតពីទោសព្រហ្មទណ្ឌផ្សេងៗទៀត។
សម្រាប់សំណុំរឿងលេខ០០២ មានដើមបណ្តឹងឈ្មោះ ខឹម មុនីកុសល ភេទប្រុស នៅខេត្តប៉ៃលិន ដោយក្រុមប្រឹក្សាជំនុំជម្រុះគ.ជ.ប សម្រេចពិន័យប្រាក់ចំនួន ១៥លានរៀល ព្រមទាំងលុបឈ្មោះចេញពីញ្ជីបោះឆ្នោត និងដកសិទ្ធិឱ្យឈរឈ្មោះឱ្យគេបោះឆ្នោត រយៈពេល ១០ឆ្នាំ ដោយមិនគិតពីទោសព្រហ្មទណ្ឌផ្សេងៗទៀត។ ដោយឡែកសម្រាប់សំណុំរឿងលេខ០០៤ និងលេខ០០៥ មានដើមបណ្តឹងឈ្មោះ យ៉ាន សុឃឿន ភេទប្រុស នៅខេត្តត្បូងឃ្មុំ ដោយក្រុមប្រឹក្សាជំនុំជម្រុះ គ.ជ.ប បានសម្រេចតម្កល់ និងពិន័យប្រាក់ចំនួន ១០លានរៀល ព្រមទាំងលុបឈ្មោះចេញពីញ្ជីបោះឆ្នោត និងដកសិទ្ធិឱ្យឈរឈ្មោះឱ្យគេបោះឆ្នោត រយៈពេល ០៥ឆ្នាំ ដោយមិនគិតពីទោសព្រហ្មទណ្ឌផ្សេងៗទៀត។
ប្រធាន គ.ជ.ប បានបញ្ជាក់ថា សេចក្តីសម្រេចនេះ ជំនុំជម្រះ និងប្រកាសជាសាធារណៈ នៅថ្ងៃទី២៧ ខែកក្កដា ឆ្នាំ២០២៣ ចំពោះមុខដើមបណ្តឹងនៅ គ.ជ.ប និងមេធាវីតំណាងចុងចម្លើយនៅ គ.ជ.ប បើកផ្លូវប្តឹងតវ៉ាទៅក្រុមប្រឹក្សាធម្មនុញ្ញតាមកំណត់ច្បាប់។
លោក ហង្ស ពុទ្ធា អ្នកនាំពាក្យ គ.ជ.ប បានឱ្យដឹងថា៖ «ជាការពិតណាស់គណៈកម្មការស៊ើបអង្កេតមួយ ត្រូវបានបង្កើតឡើងហើយត្រូវបានរកឃើញយ៉ាងពិតប្រាកដមែន អ៊ឹចឹងការសម្រេចរបស់ក្រុមប្រឹក្សាជំនុំជម្រុះនៃនៃគណៈកម្មាធិការរៀបចំការបោះឆ្នោត ក៏មានការពិនិត្យទៅលើអង្គហេតុ និងអង្គច្បាប់បន្ថែម, អង្គសវនកា គ.ជ.ប សម្រេចតម្កល់សេចក្តីសម្រេចរបស់ក្រុមប្រឹក្សាជំនុំជម្រុះនៃគណៈកម្មការរៀបចំការបោះឆ្នោតរាជធានី-ខេត្ត ទុកជាបានការ»។ លោកបន្ថែមថា ការសម្រេចតម្កល់សម្រេចរបស់ក្រុមប្រឹក្សាជំនុំជម្រុះនៃគណៈកម្មការរៀបចំការបោះឆ្នោតរាជធានី-ខេត្ត គឺមានន័យថារក្សាចំពោះការពិន័យបង់ប្រាក់ ក្នុងនោះពី ១០ ទៅ១៥លានរៀល ត្រូវលុបចេញពីបញ្ជីបោះឆ្នោត និងដកសិទ្ធិឱ្យឈរឈ្មោះឱ្យគេបោះឆ្នោតដែលមានចែងនៅក្នុងច្បាប់។
សូមជម្រាបថា យោងតាមមាត្រា ១៤២ថ្មី នៃច្បាប់ស្តីពីវិសោធនកម្មច្បាប់បោះឆ្នោត ដែលចូលជាធរមាន ចាប់តាំងពីថ្ងៃទី០៤ខែកក្កដា ឆ្នាំ២០២៣ កន្លងទៅនេះ ការញុះញង់ អុកលុក ឬរារាំងប្រជាពលរដ្ឋមិនឱ្យទៅបោះឆ្នោត ឬឱ្យគូសបំផ្លាញសន្លឹកឆ្នោត គឺជាអំពើល្មើសច្បាប់។ បទល្មើសនេះត្រូវផាកពិន័យពី៥លាន ទៅ២០លានរៀល ដោយមិនគិតពីទោសព្រហ្មទណ្ឌផ្សេងទៀតឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។