ផ្លូវជាតិលេខ៤ ត្រូវបានផ្អាកជាបណ្តោះអាសន្នដោយសារជំនន់ទឹកភ្លៀងហូរកាត់
ដោយសារភ្លៀងជាប់ៗគ្នាជាច្រើនថ្ងៃ បង្កឱ្យមានជំនន់ទឹកភ្លៀងហូរកាត់ផ្លូវជាតិលេខ៤ ចន្លោះគីឡូម៉ែត្រលេខ (១១៦-១១៧) ស្ថិតក្នុងភូមិសាស្ដ្រឃុំបាក់រទេះ ស្រុកកំពង់សិលា ខេត្តព្រះសីហនុ អាជ្ញាធរ បានផ្អាកជាបណ្តោះអាសន្ន ប្រជាពលរដ្ឋដែលត្រូវធ្វើដំណើរតាមផ្លូវជាតិលេខ៤ ត្រូវផ្លាស់ប្ដូរទិសរកផ្លូវវាង។
ក្រសួងធនធានទឹក និងឧតុនិយម បានបញ្ជាក់ថា គិតត្រឹមព្រឹកថ្ងៃទី៣០ ខែកក្កដា ឆ្នាំ២០២៣នេះ ស្ថានភាពទឹកនៅស្ទឹងសំរោង ក្នុងឃុំបាក់រទេះ ស្រុកកំពង់សិលា ខេត្តព្រះសីហនុ ផ្លូវជាតិលេខ០៤ ត្រង់គីឡូម៉ែត្រលេខ១១៦ ទឹកបានឡើងដល់កម្ពស់៥,៧៧ម៉ែត្រ/៦០០ម៉ែត្រ ដោយទឹកបានហូរកាត់ផ្លូវប្រវែងចន្លោះពី៥០ម៉ែត្រ ទៅ១០០ម៉ែត្រ ជាចំណុចជូនដំណឹងដល់ប្រជាពលរដ្ឋផ្អាកការធ្វើដំណើរឆ្លងកាត់ជាបណ្តោះអាសន្ន ដូច្នេះ ប្រជាពលរដ្ឋអាចប្រើប្រាស់ផ្លូវល្បឿនលឿនបណ្ដោះអាសន្នសិន ឬផ្លូវវៀសផ្សេងៗ។
ដោយឡែក នៅផ្លូវជាតិលេខ៤ ត្រង់ចំណុចចន្លោះគីឡូម៉ែត្រលេខ (១០៧-១០៨) ជាប់ព្រំប្រទល់រវាងឃុំយាយម៉ៅពេជ្រនិល ស្រុកភ្នំស្រួច និងឃុំអូរបាក់រទេះ ស្រុកកំពង់សិលា ខេត្តព្រះសីហនុ និងត្រង់ចន្លោះគីឡូម៉ែត្រលេខ (១០៧-១០៨) អជ្ញាធរក៏បានសម្រេចបិទចរាចរណ៍បណ្តោះអាសន្នផងដែរ។ ការបិទចរាចរណ៍ផ្លូវជាតិលេខ៤ គឺដើម្បីការពារកុំឱ្យខូចខាតផ្លូវ ព្រោះកាលណាទឹកជំនន់ហូរលើផ្លូវបែបនេះ ធ្វើឱ្យជ្រាយគ្រឹះផ្លូវបើមានឡានធំទៅវាអាចប៉ះពាល់ធ្វើឱ្យខូចដល់ផ្លូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។