លោក ថាក់ស៊ីន ត្រឡប់មកមាតុប្រទេសវិញ ក្រោយនិរទេសអស់រយៈពេល១៥ឆ្នាំ
អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា បានត្រឡប់មកមាតុប្រទេសវិញនាព្រឹកថ្ងៃទី ២២ ខែសីហានេះ បន្ទាប់ពីបាននិរទេសខ្លួននៅក្រៅប្រទេសអស់រយៈពេល ១៥ ឆ្នាំ។
លោក ថាក់ស៊ីន បានឡើងយន្តហោះឯកជនមួយក្នុងប្រទេសសិង្ហបុរី ហើយបានចុះចតនៅអាកាសយានដ្ឋានដុនមឿងនៃទីក្រុងបាងកកភ្លាមៗនៅម៉ោង ៩ ព្រឹកនេះ។ ក្រុមអ្នកគាំទ្រលោក ថាក់ស៊ីន រាប់ពាន់នាក់ ក៏បានប្រមូលផ្តុំគ្នានៅអាអាកាសយានដ្ឋានដុនមឿង ដើម្បីស្វាគមន៍លោកត្រឡប់មកប្រទេសកំណើតវិញផងដែរ។ អ្នកគាំទ្រស្លៀកពាក់ពណ៌ក្រហម បានអបអរសាទរ រាំ និងច្រៀងយ៉ាងសប្បាយរីករាយ។
ប្អូនស្រីរបស់លោក ថាក់ស៊ី ហើយក៏ជាអតីតនាយករដ្ឋមន្ត្រីថៃផងដែរ លោកស្រី យីងឡាក់ ស៊ីណាវ៉ាត្រា បានលើកឡើងថា លោកស្រីគោរពការសម្រេចចិត្តរបស់បងប្រុសខ្លួន ក្នុងការវិលត្រឡប់មកប្រទេសថៃវិញនៅថ្ងៃនេះ ហើយបានជូនពរគាត់ឱ្យជួបតែសំណាងល្អ។ នៅក្នុងសារបង្ហោះលើបណ្តាញសង្គមហ្វេសប៊ុក លោកស្រី យីងឡាក់ បានរៀបរាប់ថា៖«លោកស្រីដឹងថា លោក ថាក់ស៊ីន មានអារម្មណ៍ឯកោ សោកសៅ និងនឹកផ្ទះពេញមួយជីវិតដែលនិរទេសខ្លួន ដោយបន្ថែមថា លោកស្រីជឿថា លោក ថាក់ស៊ីន បានគិតជាយូរមកហើយមុនពេលសម្រេចចិត្តវិលត្រឡប់មកវិញនៅថ្ងៃនេះ»។
ការវិលត្រឡប់មកវិញរបស់លោក ថាក់ស៊ីន កើតឡើងស្របពេលនឹងការបោះឆ្នោតសភាជ្រើសរើសនាយករដ្ឋមន្ត្រីថ្មីធ្វើឡើងនៅថ្ងៃនេះផងដែរ ដោយសមាជិកសភាសង្ឃឹមថានឹងបំបែកភាពជាប់គាំងនយោបាយជាងបីខែបន្ទាប់ពីការបោះឆ្នោតសកល។ គណបក្សភឿថៃដែលគាំទ្រដោយលោក ថាក់ស៊ីន តែងតាំងមហាសេដ្ឋីអចលនទ្រព្យ លោក ស្រេតថា ថាវីស៊ីន ជាបេក្ខភាពនាយករដ្ឋមន្ត្រី។ គួរបញ្ជាក់ថា លោក ថាក់ស៊ីន ត្រូវប្រឈមនឹងការជាប់ពន្ធនាគារ១០ឆ្នាំក្នុងសំណុំរឿងចំនួន៣។ ប៉ុន្តែបើផ្អែកតាមការសម្រេចរបស់តុលាការ លោកទំនងជានឹងអាចជាប់ពន្ធនាគារអតិបរមាប្រាំឆ្នាំប៉ុណ្ណោះ ហើយលោកក៏អាចស្វែងរកការលើកលែងទោសពីព្រះមហាក្សត្រផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។