រូបភាព! កូនផ្សោតកើតថ្មីមួយក្បាល ជាកូនទី៧ ក្នុងអន្លង់ត្បូងខ្លា នៅខេត្តស្ទឹងត្រែង
កូនផ្សោតកើតថ្មីមួយក្បាល ត្រូវបានប្រទះឃើញហែលក្នុងក្រុមហ្វូងសត្វផ្សោតពេញវ័យដែលមានចំនួនប្រមាណជាប្រាំបីក្បាល កាលពីដើមខែកញ្ញា ឆ្នាំ២០២៣នេះ ក្នុងអន្លង់ត្បូងខ្លា ស្ថិតនៅឃុំអូរម្រះ ស្រុកសៀមបូក ខេត្តស្ទឹងត្រែង ដោយក្រុមការងារស្រាវជ្រាវនិងអភិរក្សជលផលនៃរដ្ឋបាលជលផល និងអង្គការWWF ខណៈកំពុងបំពេញការងារចុះអង្កេតស្ថានភាពសត្វផ្សោតទន្លេមេគង្គ។
បន្ទាប់ពីបានប្រទះឃើញនូវវត្តមាននៃកូនសត្វផ្សោតថ្មីនោះក្រុមការងារក៏បានធ្វើការអង្កេតពីសកម្មភាពក្នុងក្រុមហ្វូងផ្សោតធំដែលមានកូនតូចនៅជាមួយ និងបានថតរូបកូនផ្សោតថ្មីនោះជាមួយមេរបស់វា។ តាមការពិនិត្យអង្កេតជាក់ស្តែងពីក្រុមការងារ ឃើញថាពុំមានការយាយីពីសត្វផ្សោតធំលើកូនផ្សោតឡើយ។
កូនផ្សោតដែលបានប្រទះឃើញថ្មីនេះគឺជាកូនផ្សោតទីប្រាំពីរហើយ ដែលត្រូវបានកត់ត្រាថាបានកើតនៅក្នុងឆ្នាំ២០២៣ ចាប់ពីខែមករា ដល់ថ្ងៃទី០២ ខែកញ្ញា។
សត្វផ្សោតទន្លេមេគង្គ ត្រូវបានចាត់ទុកថាជារតនសម្បត្តិជាតិមានជីវិតរបស់កម្ពុជា ហើយជាប្រភេទផ្សោតមួយប្រភេទស្ថិតក្នុងចំណោម៦ប្រភេទនៃសត្វផ្សោតទឹកសាបកម្របំផុតដែលនៅសេសសល់ក្នុងពិភពលោក។ វត្តមានរបស់សត្វផ្សោតនេះជាកត្តាចង្អុលបង្ហាញមួយអំពីគុណភាពធនធានជលផល និងគុណភាពទន្លេ ក្នុងនោះរាប់បញ្ចូលទាំងជីវៈចម្រុះ ប្រព័ន្ធបរិស្ថានធម្មជាតិដែលផ្តល់នូវសេវាកម្មអេកូឡូស៊ីក្នុងការទ្រទ្រង់ជីវិតរបស់មនុស្ស និងជីវភាពរបស់សហគមន៍មូលដ្ឋានតាមរយៈវិស័យទេសចរណ៍ផងដែរ។ សូមរួមគ្នាការពារសត្វផ្សោតទន្លេមេគង្គដែលកំពុងរស់រាន ដើម្បីជាប្រយោជន៍ដល់ប្រជាជន និងបរិស្ថានធម្មជាតិ!
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។