រឹតកសម្លាប់គូស្នេហ៍ក្នុងផ្ទះសំណាក់ ពេលសមត្ថកិច្ចឃុំខ្លួន បង្អត់បាយខ្លួនឯងរហូតដល់ស្លាប់
ជនត្រូវចោទដែលបានរឹតកសម្លាប់ស្ដ្រីម្នាក់ ក្នុងផ្ទះសំណាក់ នៅស្រុកពញ្ញាឮ ខេត្តកណ្ដាល កាលពីថ្ងៃទី២៣.១២.២០២៣ បានស្លាប់បន្ទាប់ពីរងការឃុំខ្លួននៅពន្ធនាគារ ខេត្តកណ្ដាល ជិត១សប្ដាហ៍ គួបផ្សំនិងមានជំងឺប្រចាំកាយផងនោះ និងសញ្ជឹងសញ្ជប់បង្អត់បាយទឹកខ្លួនឯង រហូតត្រូវសង្គ្រោះបន្ទាន់នៅមន្ទីរពេទ្យបង្អែកជ័យជំនះ នៅក្រុងតាខ្មៅ។
-ជនត្រូវចោទឈ្មោះ ហៃ ហួត ភេទប្រុសអាយុ៥៨ឆ្នាំ នៅភូមិថ្មី ឃុំសន្លុង ស្រុកខ្សាច់កណ្ដាល ខេត្តកណ្ដាល បានស្លាប់នៅរសៀលថ្ងៃទី០២.០១.២០២៤។
គួរម្លឹកថា ស្ដ្រីរងគ្រោះឈ្មោះ ប្រាក់ ពៅ ភេទស្រីអាយុ៥៤ឆ្នាំ នៅភូមិថ្មី ឃុំសន្លុង ស្រុកខ្សាច់កណ្ដាល ខេត្តកណ្ដាល។
ត្រូវជនដៃដល់ខាងលើ ដែលជាដៃគូនិងគ្នា យកក្រមាមករឹតកសម្លាប់ក្នុងផ្ទះសំណាក់ ១កន្លែង ក្នុងស្រុកពញ្ញាឮ ខេត្តកណ្ដាល កាលពីថ្ងៃទី២៣.១២.២០២៣។
ពាក់ព័ន្ធអំពើឃាតកម្មនេះផងដែរ ក្រោយកើតហេតុ សមត្ថកិច្ចបានស្រាវជ្រាវឈានដល់ឃាត់ខ្លួន ជនសង្ស័យឈ្មោះ ហៃ ហួត ។ទន្ទឹមនិងនោះ ជនសង្ស័យឈ្មោះ ហៃ ហួត ក៏បានសារភាពថា ។
មូលហេតុមកពីខ្លួន ប្រចណ្ឌនិងជនរងគ្រោះ ដែលមានទំនាក់ទំនងស្នេហាជាមួយប្រុសផ្សេង ហាមមិនស្ដាប់រហូតឈ្លោះប្រកែកគ្នា ក្នុងផ្ទះសំណាក់ ទើបឈានដល់អំពើឃាតកម្មកើតឡើង។
បើតាមសេចក្ដីរាយការណ៍មកសារព័ត៌មានខណៈពេលកំពុងឃុំខ្លួន នៅពន្ធនាគារខេត្តកណ្ដាល ជនត្រូវចោទឈ្មោះ ហៃ ហួត បានកើតអាការៈសញ្ជឹងសញ្ជប់មិននិយាយស្ដី មិនទទួលទានអាហារ និងបង្អត់បាយទឹកខ្លួនឯង ស្របពេលដែលរូបគាត់ មានជំងឺប្រចាំកាយ( ទឹកនោមផ្អែមផងនោះ)។
បណ្ដាលឱ្យជំងឺជនត្រូវចោទ ហៃ ហួត វិវត្តជំម្ងឺទៅមុខយ៉ាងឆាប់រហ័ស ធ្លាក់ខ្លួនឈឺធ្ងន់ ហើយក៏ត្រូវបានសមត្ថកិច្ច នាំមកសង្គ្រោះបន្ទាន់ នៅមន្ទីរពេទ្យបង្អែកជ័យជំនះ នៃក្រុងតាខ្មៅ លុះដល់រសៀលថ្ងៃទី០២.០១.២០២៤ ជនត្រូវចោទ ហៃ ហួត បានស្លាប់តែម្តង។
បច្ចុប្បន្ន ក្រុមគ្រួសារសព កំពុងធ្វើបុណ្យតាមប្រពៃណី នៅផ្ទះក្នុងភូមិថ្មី ឃុំសន្លុង ស្រុកខ្សាច់កណ្ដាល ខេត្តកណ្ដាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។