ចំនួនអ្នកស្លាប់កើនដល់ជិត ១០០នាក់ និងជាង ២០០នាក់ទៀត បាត់ខ្លួន ក្នុងគ្រោះរញ្ជួយដីកម្រិតធ្ងន់ នៅជប៉ុន
ក្រុមមន្ត្រីនៅក្នុងប្រទេសជប៉ុន នៅព្រឹកថ្ងៃសុក្រ ទី៥ ខែមករានេះបានឱ្យដឹងថា តួលេខអ្នកស្លាប់ បន្ទាប់ពីគ្រោះរញ្ជួយដីកម្រិតធ្ងន់ បានវាយប្រហារចំតំបន់ភាគកណ្តាលប្រទេសជប៉ុន កាលពីថ្ងៃចូលឆ្នាំសកលកន្លងទៅ បានបន្តកើនដល់ ៩២នាក់ ខណៈអ្នកបាត់ខ្លួនក៏បាន កើនដល់ ២៤២នាក់ផងដែរ។ នេះបើតាមការចេញផ្សាយដោយទីភ្នាក់ងារព័ត៌មាន AFP។
គិតត្រឹមរសៀលថ្ងៃព្រហស្បតិ៍ម្សិលមិញ ពោល ៧២ម៉ោងក្រោយគ្រោះរញ្ជួយដី ស្ត្រីចំណាស់ ២នាក់បាននៅរស់រានមានជីវិត និងត្រូវបាន ក្រុមអ្នកជួយសង្គ្រោះទាញចេញពីគំនរបែកបាក់នៃផ្ទះរបស់ពួកគេដែលបានបាក់រលំ នៅក្នុងទីក្រុង Wajima ដែលជាទីក្រុងមួយរងគ្រោះធ្ងន់ធ្ងរ ជាងគេដោយសារគ្រោះរញ្ជួយដី។
គួរបញ្ជាក់ថា គ្រោះរញ្ជួយដីខ្លាំងៗបន្តបន្ទាប់គ្នា ក្នុងនោះរួមមានទាំងកម្រិត៧.៦រ៉ិចទ័រ បានវាយប្រហារជប៉ុន កាលពីថ្ងៃចន្ទសប្តាហ៍នេះ។ គិតចាប់តាំងពីពេលនោះ ជប៉ុនបានកត់ត្រាការកើតមានរំញ័រ សរុបយ៉ាងហោច១៥៥លើក។ អាជ្ញាធរជប៉ុន ក៏បានប្រកាសអាសន្នពី រលកស៊ូណាមិផងដែរ ប៉ុន្តែនៅព្រឹកថ្ងៃអង្គារនេះ បានសម្រេចដកការប្រកាសអាសន្ននោះចេញវិញ។
តាមអាជ្ញាធរជប៉ុន មនុស្សយ៉ាងហោច ៣៣០នាក់បានរងរបួស។ ចំណែកប្រជាជន ៣០,០០០គ្រួសារកំពុងគ្មានអគ្គិសនីប្រើប្រាស់ ជាពិសេស នៅក្នុងខេត្ត Ishikawa ហើយផ្ទះ ៨៩,៨០០ខ្នង នៅក្នុងខេត្តមួយនេះ និងតំបន់ក្បែរខាងចំនួន ២ទៀត គ្មានទឹកប្រើប្រាស់គ្រប់គ្រាន់ ខណៈ ទំហំនៃការខូចខាតកំពុងស្ថិតក្រោមការវាយតម្លៃនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។