ឆ្នាំ២០២៤! ចំនួនលក់របស់ iPhone នឹងបន្តធ្លាក់ចុះខ្ទង់ ១៥ភាគរយបន្ថែមទៀត
ប្រភពពីអ្នកវិភាគទីផ្សារស្មាតហ្វូនដ៏ល្បីល្បាញលោក Ming-Chi Kou បានបង្ហាញថា ចំនួនលក់ iPhone 15 និង iPhone 16 ជំនាន់ចុងក្រោយរបស់ក្រុមហ៊ុន Apple នឹងបន្តធ្លាក់ចុះចន្លោះពី ១០ ទៅ ១៥ភាគរយក្នុងឆ្នាំ២០២៤។ លោកបានគូសបញ្ជាក់ថា ការធ្លាក់ចុះនេះបណ្តាលមកពីកត្តាជាច្រើន រួមទាំងការកើនឡើងនៃប្រជាប្រិយភាពស្មាតហ្វូនអេក្រង់បត់ ព្រមទាំងការលេចចេញនូវគំរូស្មាតហ្វូនថ្មីៗដែលមានតម្លៃសមរម្យ។ នេះបើយោងតាមការចេញផ្សាយរបស់សារព័ត៌មាន GSMArena នៅថ្ងៃទី០១ ខែកុម្ភៈ ឆ្នាំ២០២៤។
ផ្អែកតាមការស្ទង់មតិនាពេលថ្មីៗនេះ លោក Kou បានរកឃើញហេតុផលមួយចំនួន ដែលជាកត្តារាំងស្ទះដល់ការលក់ iPhone រួមមាន៖
• កង្វះការឌីហ្សាញ៖ លោក Kou បានលើកឡើងថា Apple ប្រហែលជាមិនធ្វើការផ្លាស់ប្តូររូបរាងឌីហ្សាញលើ iPhone រហូតដល់ឆ្នាំ២០២៥ ឯណោះ ខណៈម៉ូដែល iPhone 16 ដែលចេញលក់ក្នុងឆ្នាំ២០២៤ នេះមិនមានបន្ថែមការឌីហ្សាញណាមួយគួរឱ្យកត់សម្គាល់ក្រៅពីអេក្រង់ធំ និងប៊ូតុងបិទ/ បើកសម្លេង (Capture Button) ហើយក្នុងនោះសូម្បីតែមុខងារ AI ក៏គ្មានមកជាមួយផងដែរ។ ការខ្វះខាតមុខងារថ្មីៗសំខាន់ៗទាំងនេះ ត្រូវបានគេរំពឹងថា នឹងប៉ះពាល់ដល់សន្ទុះនៃចំនួនដាក់លក់ iPhone ពោលគឺអាចពេញមួយឆ្នាំតែម្តង។
• ការដើរតាមចំណូលចិត្តទីផ្សារ៖ ស្មាតហ្វូនអេក្រង់បត់ កំពុងទទួលបានប្រជាប្រិយភាព និងការគាំទ្រជាខ្លាំងពីសំណាក់អ្នកប្រើប្រាស់ ជាពិសេសនៅក្នុងផ្នែកស្មាតហ្វូនដែលមានតម្លៃខ្ពស់ ខណៈដែលអ្នកប្រើប្រាស់ភាគច្រើនកំពុងតែងាកទៅទទួលយកបទពិសោធន៍ស្មាតហ្វូនថ្មី បើទោះជាមានតម្លៃប្រហាក់ប្រហែលគ្នាក៏ដោយ។
• បញ្ហាប្រឈមនៅក្នុងប្រទេសចិន៖ ចំនួនលក់ iPhone ក្នុងប្រទេសចិន ដែលជាទីផ្សារដ៏សំខាន់បំផុតរបស់ Apple កំពុងតែបន្តធ្លាក់ចុះជាបន្តបន្ទាប់ ក្រោយគូប្រជែង Huawei ឈានជើងចូលទីផ្សារស្មាតហ្វូនវិញ ព្រមទាំងគោលការណ៍ប្រើប្រាស់ថ្មីក្នុងប្រទេសចិន ដោយអ្នកប្រើប្រាស់ភាគច្រើនស្នេហាជាតិ និងងាកទៅប្រើប្រាស់ជាមួយនឹងប្រព័ន្ធដំណើរការ «Made-in-China» ជំនួសវិញ។
គួរជម្រាបដែរថា ដោយសារតែកត្តាទាំងប៉ុន្មានខាងលើនេះ រួមជាមួយនឹងការបាត់ទំនុកចិត្ត ក្រុមហ៊ុន Apple សម្រេចទម្លាក់ការបញ្ចាទិញផលិតផលពាក់កណ្តាលសម្រេច (semiconductor) របស់ខ្លួនជាមួយនឹងអ្នកផ្គត់ផ្គង់រហូតដល់ទៅ ១៥ភាគរយឯណោះ។ ជាងនេះទៅទៀតលោក Kou បន្តអះអាងថា Apple នឹងប្រឈមមុខនឹងការធ្លាក់ចុះចំនួនលក់ iPhone ក្នុងប្រទេសចិនបន្ថែមទៀតពេញមួយឆ្នាំ២០២៤ នេះចន្លោះពី ៣០ ទៅ ៤០ភាគរយឯណោះ៕
ប្រភព៖ Fresh News
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។