ហេតុអ្វីបានជាមានកំណើនអ្នកវិនិយោគចិននៅកម្ពុជាច្រើន?
បច្ចុប្បន្ននេះ គេសង្កេតឃើញថា កំណើនអ្នកវិនិយោគិនចិនបាននិងកំពុងមកបណ្តាក់ទុនរកស៊ីនៅកម្ពុជាយ៉ាងច្រើន, ជាក់ស្តែងវិស័យដែលមើលឃើញថាមានការរីកចម្រើនខ្លាំងក្នុងពេលបច្ចុប្បន្ននេះ គឺពាក់ព័ន្ធនឹងវិស័យដីធ្លី និងសំណង់ ដែលសុទ្ធសឹងតែជាការវិនិយោគរបស់អ្នកវិនិយោគទុនជនជាតិចិន។
តើមានមូលហេតុអ្វីបាននាំឲ្យអ្នកវិនិយោគជនជាតិចិនទាំងនោះមកបណ្តាក់ទុករកស៊ីនៅកម្ពុជា?
ថ្លែងក្នុងសន្និសីទសារព័ត៌មាន កាលពីរសៀលថ្ងៃទី១៦ ខែមករា ឆ្នាំ២០១៩ នៅស្ថានទូតចិនប្រចាំនៅកម្ពុជា លោក Wang wentian ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជា បានលើកឡើងថា កំណើនអ្នកវិនិយោគចិនមកបណ្តាក់ទុនច្រើននៅកម្ពុជានេះ គឺដោយសារទំនាក់ទំនងកិច្ចសហប្រតិបត្តិការរវាងចិន និងកម្ពុជា មានភាពរឹងមាំ និងរីកចម្រើន។
លោកថា ក្នុងនោះស្ថិរភាពនយោបាយនៅកម្ពុជាក៏ជាកត្តាដែលជំរុញកំណើនអ្នកវិនិយោគចិននៅកម្ពុជា បូករួមជាមួយរាជរដ្ឋាភិបាលកម្ពុជា ក្រោមការដឹកនាំរបស់ គណបក្សប្រជាជនកម្ពុជាដែលធ្វើឱ្យកម្ពុជាមានភាពរឹងមាំល្អ ក៏ជាផ្នែកមួយទៀតដែលធ្វើ ឱ្យអ្នកវិនិយោគចិនមកបណ្តាក់ទុកនៅកម្ពុជាច្រើនផងដែរ។
លោកទូតបន្តថា មួយវិញទៀតបរិយាកាស និងគោលនយោបាយរបស់កម្ពុជាល្អ ក៏ជាកត្តារួមផ្សំដែលធ្វើឱ្យអ្នកវិនិយោគចិនមកបណ្តាក់ទុននៅកម្ពុជា។ ជាមួយគ្នានេះ ការបង្កើនការវិនិយោគរបស់វិនិយោគិនចិននៅកម្ពុជាគឺជាកិច្ចពង្រឹងកិច្ចសហប្រតិបត្តិការជាក់ស្តែងគ្រប់ជ្រុងជ្រោយរវាងប្រទេសទាំងពីរ។
តាមឯកអគ្គរដ្ឋទូតចិនរូបនេះថា តាមរយៈការវិនិយោគិនចិនមកបណ្ដាក់ទុននៅកម្ពុជា កាន់តែច្រើននេះ នឹងធ្វើឱ្យសេដ្ឋកិច្ចរបស់កម្ពុជាកាន់តែមានការរីកចម្រើន និងបង្កើនឱកាស ការងារច្រើនដល់ពលរដ្ឋកម្ពុជាផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។