បត់ម៉ូតូចូលចាក់សាំង ម៉ូតូមួយទៀតមកបុកស្លាប់ប្រពន្ធនៅហ្នឹងកន្លែង ចំណែកប្តីរបួសធ្ងន់ ជនបង្ករបើកម៉ូតូរត់បាត់
កោះកុង ៖ កម្មការិនីរោងចក្រម្នាក់បានស្លាប់ភ្លាមៗនៅនឹងកន្លែងកើតហេតុ ក្រោយជួបគ្រោះថ្នាក់ចរាចរណ៍រវាងម៉ូតូនិងម៉ូតូកាលពីវេលាម៉ោង៦ និង៣០នាទីព្រឹក នាថ្ងៃទី៦ ខែកុម្ភះ ឆ្នាំ២០១៩ ត្រង់ចំនុចការ៉ាស់សាំង លឹម លុង ស្ថិតក្នុងភូមិ២ សង្កាត់ដងទង់ ក្រុងខេមរភូមិន្ទ ខេត្តកោះកុង ។
បើតាមការឲ្យដឹងពីសាក្សីថា ហេតុការណ៍គ្រោះថ្នាក់ចរាចរណ៍ខាងលើ បានបង្កឡើងដោយម៉ូតូបុកជាមួយម៉ូតូក្នុងទិសដៅស្របគ្នា ពេលដែលបត់ចូលចាក់សាំងនៅការ៉ាស់សាំង លឹម លុង ដែលមានទីតាំងក្នុងសង្កាត់ដងទង់ បណ្តាលឲ្យមនុស្សម្នាក់បានស្លាប់បាត់បង់ជីវិតភ្លាមៗនៅនិងកន្លែងកើតហេតុនិងម្នាក់ទៀតរងរបួសធ្ងន់ ។
ចំណែកខាងសមត្ថកិច្ចនគរបាលក្រុងខេមរភូមិន្ទក៏បានឲ្យដឹងដែរថា នារីរងគ្រោះដែលបានស្លាប់ក្នុងហេតុការគ្រោះថ្នាក់ចរាចរណ៍ខាងលើមានឈ្មោះ យូ អាយស៊ីយះ ភេទស្រី អាយុ២៦ឆ្នាំ ជនជាតិខ្មែរឥស្លាម មុខរបរកម្មការិនីរោងចក្រ (ស្លាប់ភ្លាមៗនៅនិងកន្លែង) និងជនរងគ្រោះម្នាក់ទៀតឈ្មោះ លី ហានហ្វះ ភេទប្រុស អាយុ៣៤ឆ្នាំ ជនជាតិខ្មែរឥស្លាម មានមុខរបរជាកម្មករនេសាទ ជាអ្នកបើកបរម៉ូតូម៉ាក DREAM C125 សេរីឆ្នាំ២០១៨ ព័ណខ្មៅ ពាក់ស្លាកលេខ កោះកុង1B-8213 (រងរបួសធ្ងន់) ជនរងគ្រោះទាំង២ជាប្តី ប្រពន្ធនិងគ្នារស់នៅក្នុងភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង ។
ក្រោយកើតហេតុសមត្ថកិច្ចបានប្រគល់សាកសពនារីរងគ្រោះឲ្យទៅក្រុមគ្រួសារដើម្បីយកទៅធ្វើបុណ្យតាមប្រពៃណី ចំណែកជនរងគ្រោះម្នាក់ត្រូវបានបញ្ជូនទៅកាន់មន្ទីរពេទ្យដើម្បីពិនិត្យនិងព្យាបាល ។
ដោយឡែកខាងជនបង្កបានរត់គេចខ្លួនបាត់ស្រមោល ហើយខាងសមត្ថកិច្ចកំពុងធ្វើការស្រាវជ្រាវដើម្បីរកមុខជនបង្កយកមកផ្តន្ទាទោសតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។