សំណង់អគារចាស់ស្ថិតនៅកាច់ជ្រុងផ្លូវព្រះមុនីវង្ស និងផ្លូវកម្ពុជាក្រោមអាចប្រឈមនឹងការរលំ រដ្ឋបាលរាជធានីភ្នំពេញប្រាប់ឲ្យពលរដ្ឋប្រុងប្រយ័ត្ន
រដ្ឋបាលរាជធានីភ្នំពេញកាលពីពេលថ្មីៗនេះ បានចេញនូវសេចក្តីជូនដំណឹងមួយ ដោយបង្ហាញពីការព្រួយបារម្ភចំពោះស្ថានភាពចាស់ទ្រុឌទ្រោម នៃអគារសហកម្មសិទ្ធិស្ថិតនៅកាច់ជ្រុងមហាវិថីព្រះមុនីវង្ស និងមហាវិថីកម្ពុជាក្រោម ទល់មុខអគារពាណិជ្ជកម្មផ្សារទំនើប BS ក្នុងខណ្ឌ៧មករា ដែលអាចប្រឈមនឹងការបាក់រលំ។
រដ្ឋបាលរាជធានីភ្នំពេញ ដោយយោងទៅលើលិខិតបញ្ជាក់របស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា សំណង់អគារនេះ គឺមានសភាពទ្រុឌទ្រោមយ៉ាងខ្លាំងគួរឲ្យព្រួយបារម្ភ ដោយសារតែសំណង់នេះខ្វះការថែទាំជួសជុលឲ្យបានត្រឹមត្រូវអស់រយៈពេលជាយូរឆ្នាំមកហើយ ជាហេតុធ្វើឲ្យអគារទាំងមូលទទួលរងនូវការខូចខាតប្រះស្រាំជាច្រើនកន្លែង ជាពិសេសគ្រឿងបង្គុំសំណង់មានសភាពពុកផុយខូចអស់ប្រមាណ៥០ភាគរយទៅហើយ ដោយវាអាចបណ្តាលឲ្យរលំបាក់ស្រុតនៅពេលណាមួយ។
ជាវិធានការដើម្បីបង្ការ និងទប់ស្កាត់គ្រោះថ្នាក់ផ្សេងៗ រដ្ឋបាលរាជធានីភ្នំពេញបានធ្វើការណែនាំដល់បងប្អូនប្រជាពលរដ្ឋទាំងអស់ដែលស្នាក់នៅលើអគារនេះ ត្រូវមានការប្រុងប្រយ័ត្នខ្ពស់ ដោយមិនត្រូវផ្ទុកសម្ភារៈធ្ងន់លើសទម្ងន់ទេ។ ជាមួយគ្នាបងប្អូនប្រជាពលរដ្ឋស្នាក់នៅផ្ទះដែលមានសភាពប្រេះស្រាំ ខូចខាតខ្លាំង ត្រូវស្វែងរកក្រុមហ៊ុន ឬវិស្វករដែលមានជំនាញច្បាស់លាស់ ដើម្បីធ្វើការថែទាំជួសជុលជាបន្ទាន់។
ក្នុងករណីដែលផ្ទះរបស់បងប្អូនមានសភាពទ្រុឌទ្រោមខ្លាំងមិនអាចជួសជុលបាន ត្រូវធ្វើការផ្លាស់ប្តូរទៅលំនៅដ្ឋានថ្មីដែលមានសុវត្ថិភាពឲ្យបានឆាប់រហ័ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។