រដ្ឋមន្ត្រីក្រសួងសេដ្ឋកិច្ច ជំរុញមន្ត្រីគយនៅច្រកទ្វារអន្តរជាតិភ្នំដិន ពង្រឹងការប្រមូលចំណូលពន្ធឲ្យកាន់តែមានការកើនឡើងថែមទៀត
ថ្លែងនៅចំពោះមុខមន្ត្រីគយជាច្រើនរូប ក្នុងពិធីសម្ពោធដាក់ឲ្យប្រើប្រាស់ជាផ្លូវការនូវ អគារស្នាក់នៅរបស់ការិយាល័យគយ និងរដ្ឋាករភ្នំដិន នៅច្រកទ្វារអន្តរជាតិភ្នំដិន ស្ថិតនៅឃុំភ្នំដិន ស្រុកគិរីវង់ ខេត្តតាកែវ នាព្រឹកថ្ងៃទី០៦ ខែមិនា ឆ្នាំ២០១៩ ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហរិញ្ញវត្ថុ បានណែនាំឲ្យមន្ត្រីគយ ប្រចាំច្រកទ្វាអន្តរជាតិភ្នំដិន ត្រូវប្រឹងប្រែងប្រមូលចំណូលពន្ធជូនរដ្ឋ ឲ្យមានការកើនឡើងព្រោះ គម្រោងចំណាយរបស់រដ្ឋាភិបាល បានកើនឡើងជារៀងរាល់ឆ្នាំផងដែរ។
ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានមានប្រសាសន៍បន្តថា ពីមួយឆ្នាំទៅមួយឆ្នាំ ការចំណាយរបស់រដ្ឋាភិបាលមានការកើនឡើងជាលំដាប់ ដូច្នោះមន្ត្រីគយដែល មានភារកិច្ចប្រមូលចំណូលពន្ធជូនរដ្ឋ ត្រូវធ្វើយ៉ាងណារកចំណូលចូលថវិកាជាតិ ឲ្យបានកាន់តែច្រើន ឡើង តាមរយៈការប្រមូលពន្ធលើទំនិញនាំចេញ នាំចូលតាមច្រកទ្វាអន្តរជាតិនេះប្រកបដោយ តម្លាភាព គណេយ្យភាពនិងការប្រមូលពន្ធ ប្រកបទៅដោយស្តង់ដាវិជ្ជាជីវៈត្រឹមត្រូវ ជាពិសេសត្រូវ ធ្វើការទប់ស្កាត់រាល់ទំនិញគេចពន្ធ ដែលពួកឈ្មួញខិលខូចលួចនាំទំនិញចេញចូលតាមច្រករបៀង នានាឲ្យបានជាដាច់ខាត។
ក្រៅពីបានណែនាំដល់មន្ត្រីគយ ឲ្យបន្តប្រឹងប្រែងប្រមូលចំណូលថវិកាជាតិ ឯកឧត្តមអគ្គ បណ្ឌិតសភាចារ្យ អូន មុនីរ័ត្ន ក៏បានណែនាំដល់មន្ត្រីគយ ដែលប្រចាំការនៅច្រកទ្វារព្រំដែន អន្តរជាតិភ្នំដិន ត្រូវចេះសហការជាមួយសមត្ថកិច្ច អាជ្ញាធមូលដ្ឋានជាពិសេសត្រូវសហការ ជាមួយ មន្ត្រីវៀតណាមដែលនៅច្រកទ្វាព្រំដែនជិតគ្នា ព្រោះការចេះសហការគ្នា ល្អវាក៏ជាប្រភពដែលនាំ ឲ្យមានការប្រមូលចំណូលពន្ធជូនជាតិបានកាន់តែច្រើនឡើងផងដែរ។
នៅក្នុងឱកាសនោះឯកឧត្តមរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏បានជំរុញឲ្យអង្គភាព គយនៅច្រកទ្វាអន្តរជាតិភ្នំដិន ត្រូវបន្តអភិវឌ្ឍន៍កន្លែងស្នាក់នៅរបស់មន្ត្រី កន្លែងធ្វើការរបស់មន្ត្រីឲ្យ មានភាពសមរម្យជាពិសេសត្រូវបង្កលក្ខណៈងាយស្រួលដល់អ្នកចូលមកបង់ពន្ធ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។