អាជ្ញាធរខេត្តព្រះវិហារ និងខេត្តអ៊ូប៊ុន ជួបគ្នាម្តងទៀត រឿងប្រែច្រកអានសេះ ជាច្រកទ្វារអន្តរជាតិ
មន្រ្តីកម្ពុជា-ថៃ កាលពីថ្ងៃទី៨ មីនា ម្សិលមិញ បានជួបប្រជុំគ្នាម្តងទៀត នៅច្រកទ្វារអានសេះ ដើម្បីពិភាក្សាបញ្ហាពីដំណើរការឈានទៅដល់ការបើកច្រកទ្វារមួយនេះ ឲ្យក្លាយជាច្រកទ្វារអន្តរជាតិ នាពេលខាងមុខ។
លោក ជា គឹមសេង អភិបាលស្រុកជាំក្សាន្ត នៃខេត្តព្រះវិហារ បានថ្លែងថា កិច្ចប្រជុំនេះមានការចូលរួមពីពីអភិបាលរងខេត្តជាប់ព្រំដែន នៃប្រទេសទាំង២ អភិបាលស្រុក និងខាងកម្លាំងយោធា នៃប្រទេសទាំង២ផងដែរ។
ប៉ុន្តែចំពោះលទ្ធផល នៃកិច្ចពិភាក្សានេះ នៅមិនទាន់ទទួលលទ្ធផលនោះទេ ដោយភាគីទាំង២ នឹងដាក់ឆ្លងទៅថ្នាក់ដឹកនាំខេត្ត និងរាជរដ្ឋាភិបាល ដើម្បីសុំគោលការណ៍សម្រេចនៅពេលក្រោយទៀត។
គួរបញ្ជាក់ថា កាលពីពេលកន្លងទៅ អភិបាលខេត្តព្រះវិហាររបស់កម្ពុជា លោក អ៊ុន ចាន់ដា និងអភិបាលខេត្តអ៊ូប៊ុន របស់ថៃ លោក សារិទ្ធិ វិធូន បានប្តេជ្ញាថា និងដោះស្រាយបញ្ហារួមគ្នា នៅច្រកអានសេះនេះ ឲ្យបានល្អ ដើម្បីឈានដល់ការបើកច្រកនេះ ជាច្រកអន្តរជាតិក្នុងពេលឆាប់ៗនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។