សម្តេច ហ៊ុន សែន ចង់ឲ្យមានទោសប្រហារជីវិតឡើងវិញ
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាន លើកឡើងអំពីគំនិតផ្ដួចផ្ដើម ដើម្បីធ្វើវិសោធនកម្មរដ្ឋធម្មនុញ្ញ បើកឱ្យមានទោសប្រហារជីវិតទៅលើជនល្មើសដែលរំលោភសេពសន្ទវៈទៅលើសាច់ញាញត្តិខ្លួនឯង ដូចជា ជីតារំលោភចៅខ្លួនឯង ឪពុករំលោកូនខ្លួនឯង ឪពុកមារំលោភក្មួយខ្លួនឯង ដើម្បីលុបបំបាត់ធាតុជាតិរិច្ឆាន ក្នុងសង្គមខ្មែរនោះ។
ក្នុងឱកាសអញ្ជើញចុះសាកសួរសុខទុកដល់យុវតី និងកុមារីប្រមាណជិត១០០នាក់ ដែលរងគ្រោះដោយការកេងប្រវ័ញ្ច ជួញដូរ និងរំលោភបំពានផ្លូវភេទ នៅមជ្ឈមណ្ឌលបណ្ដុះបណ្ដាលវិជ្ជាជីវៈ និងស្ដារនីតិសម្បទាយុវនារី អាហ្វេស៊ីប ទុំឌី របស់អង្គការអាហ្វេស៊ីបកម្ពុជា ដែលមានទីតាំនៅសង្កាត់ព្រៃស ខណ្ឌដង្កោ រាជធានីភ្នំពេញ នាព្រឹកថ្ងៃទី ១០ ខែមីនាឆ្នាំ២០១៩ សម្ដេចតេជោ ហ៊ុន សែន បានមានប្រសាសន៍ថា សម្ដេចពិតជាយល់អំពីការឈឺ ចាប់របស់ស្ត្រី និងកុមារីរងគ្រោះ ហើយសម្ដេចកំពុងតែដាក់ចេញជាសំណួរថា តើលើលោកនេះធាតុជាតិរិច្ឆានរបស់មនុស្សវាមានប៉ុន្មានភាគរយ ហើយបើទោះបីជាមានកម្រិតប៉ុណ្ណាក៏ដោយ ក៏ប៉ុន្តែស្ថានភាពជាធាតុជាតិរិច្ឆានមិនគួរត្រូវបានអត់ឱននោះទេ។
សម្ដេចតេជោបានលើកឡើងថា សម្ដេចចង់មានគំនិតផ្ដួចផ្ដើមដើម្បីធ្វើវិសោធនកម្មរដ្ឋធម្មនុញ្ញ បើកឱ្យមានទោសប្រហារជីវិតឡើងវិញ ចំពោះជនណាដែលរំលោភទៅលើកូនខ្លួនឯង ឪពុករំលោភកូនខ្លួនឯង ជីតារំលោភចៅខ្លួនឯងគួរកម្រិតទោសប្រហារជីវិត តែនេះគ្រាន់តែជាការគិតរបស់សម្ដេចទេ។ តែរឿងដែលត្រូវធ្វើវិសោធនកម្មរដ្ឋធម្មនុញ្ញ ប្រហែលជាមិនអាចធ្វើតាមសំណើរនាយករដ្ឋមន្ត្រី ឬក៏សមាជិរដ្ឋសភា ដែលធ្វើជាសេចក្ដីស្នើច្បាប់ ឬសេចក្ដីព្រាងច្បាប់ទេ ប្រហែលជាដើរដល់ការធ្វើប្រជាមតិ ថាគួរមានទោសប្រហារជីវិតឡើងវិញ ឬអត់។
សម្ដេចតេជោបានបន្ដថា ប៉ុន្តែទោសប្រហារជីវិតនេះគួរកំណត់ត្រឹមតែ ជីតារំលោភចៅខ្លួនឯង ឪពុករំលោភកូនខ្លួនឯង ឪពុកមារំលោភលើក្មួយខ្លួនឯង ត្រឹមកម្រិតប៉ុណ្ណេះអាចសមស្រប។
ប៉ុន្តែរឿងនេះគឺជាការគិតរបស់សម្ដេច តែសម្ដេចមិនប្រើអំណាចរបស់សម្ដេច ដើម្បីស្នើសុំព្រះមហាក្សត្រ ដើម្បីនឹងធ្វើការកែរដ្ឋធម្មនុញ្ញ ធ្វើវិសោធនកម្មរដ្ឋធម្មនុញ្ញ បើកឱ្យមានទោសប្រហារជីវិតឡើងវិញនោះទេ ហើយក៏មិនស្នើសុំឱ្យសមាជិរដ្ឋសភាដើម្បីចុះហត្ថលេខាស្នើសុំធ្វើវិសោធនកម្មដែរ។
សម្ដេចតេជោបានអះអាងថា ប្រសិនបើតម្រូវបែបនេះ ចាំបាច់ត្រូវធ្វើប្រជាមតិទូទាំងប្រទេសដើម្បីសម្រេចថា តើត្រូវធ្វើវិសោធនកម្ម ឬអត់។ សម្ដេចថ្លែងបន្តថា សម្ដេចយល់ពីការឈឺចាប់របស់ចៅៗ ហើយការឈឺចាប់នេះវាប៉ះទង្គិចធំ មិនមែគ្រាន់តែ សម្រាប់ខ្លួនចៅទេ ក៏ប៉ុន្តែសម្រាប់អ្នកដែមានចិត្តជាមនុស្ស ដែលមិនមែនជាតិរិច្ឆាន ក៏ត្រូវទទួលការប៉ះពាល់ខាងផ្លូវចិត្តផងដែរ។
សម្ដេតេជោនាយករដ្ឋមន្ត្រីគូសបញ្ជាក់ថា សារព្រមានមួយនេះ ដូចជាជីតារំលោភចៅ ឪពុករំលោភកូន ឪពុកមារំលោភកម្មួយបង្កើត បងរំលោភប្អូន នេះគឺជាការគិតរបស់សម្ដេច បើសិនជាករណីនេះវារីករាលដាល ការធ្វើវិសោធនកម្មរដ្ឋធម្មនុញ្ញ ដែលឈានដល់ការឱ្យមានទោសប្រហារជីវិតឡើងវិញ អាចនឹងត្រូវធ្វើប៉ុន្តែឆ្លងកាត់ការធ្វើប្រជាមតិ ព្រោះយើងចង់បង្ក្រាបនូវធាតុតិរិច្ឆានមួយដែលកើតនៅក្នុងសង្គមខ្មែរយើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។