សមយុទ្ធនាគមាសឆ្នាំ២០១៩ នឹងចាប់ផ្តើមជាផ្លូវការនៅថ្ងៃស្អែក
លំហាត់សមយុទ្ធនាគមាសឆ្នាំ២០១៩ រវាងកងទ័ពកម្ពុជា និងចិន នឹងចាប់ផ្តើមជាផ្លូវការហើយនៅថ្ងៃទី១៣ ខែមីនា ស្អែកនេះហើយ ដែលគ្រោងនឹងធ្វើឡើងនៅទីលានបាញ់គ្រាប់ពិត សាលាហ្វឹកហ្វឺនតេជោសែនជុំគីរី របស់កងពលតូចលេខ៧០ មានទីតាំងនៅក្នុងឃុំត្រពាំងរាំង ស្រុកជុំគីរី ខេត្តកំពត។
លំហាត់សមយុទ្ធនេះ មានភាគីកងទ័ពរំដោះប្រជាជនចិន ចូលរួមចំនួន២៥២នាក់ និងភាគីកម្ពុជា ចំនួន២ពាន់៥៤២នាក់ ក្នុងនោះមានកម្លាំងធ្វើលំហាត់ចំនួន៣៨២នាក់ កម្លាំងបម្រើការក្នុងលំហាត់ ចំនួន ៤៤៨នាក់ កម្លាំងចូលរួមក្នុងពិធីបើក-បិទ ចំនួន១ពាន់៦៨៥នាក់។
លោកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិកម្ពុជា បានឲ្យដឹងថា លំហាត់ហ្វឹកហ្វឺននាគមាស ឆ្នាំ២០១៩ ធ្វើឡើងដើម្បីពង្រឹងកិច្ចសហប្រតិបត្តិការល្អ រវាងកងយោធពលខេមរភូមិន្ទ ជាមួយកងទ័ពរំដោះប្រជាជនចិន ដើម្បីផ្លាស់ប្តូរបទពិសោធន៍ធ្វើលំហាត់រួមគ្នា លើកិច្ចការមនុស្សធម៌ការ ជួយសង្គ្រោះគ្រោះមហន្តរាយ ការប្រឆាំងភេវរកម្ម ការរក្សាសន្តិភាព ក្នុងក្របខណ្ឌរបស់អង្គការសហប្រជាជាតិ ក្នុងមួយឆ្នាំម្តងៗ និងគ្រប់ប្រភេទទ័ព ស្របតាមកិច្ចសហប្រតិបត្តិការ របស់ក្រសួងការពារជាតិ នៃប្រទេសទាំងពីរ។
លំហាត់សមយុទ្ធនេះ ក៏ដើម្បីឆ្លុះបញ្ចាំងអំពីគោលជំហររបស់រាជរដ្ឋាភិបាល ជាពិសេស កងយោធពលខេមរភូមិន្ទ ក្នុងការអនុវត្តនយោបាយការពារជាតិ រវាងប្រទេសទាំងពីរ (កម្ពុជា-ចិន) លើកិច្ចសហប្រតិបត្តិការអន្តរជាតិ ក្នុងការជួយគ្នាលើគ្រប់វិស័យ និងគ្រប់ជ្រុងជ្រោយទាំងអស់ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។