សម្តេច ហ៊ុន សែន ប្រកាសកុំឲ្យមានអ្នកកាងនៅក្រោយខ្នងចំពោះរឿងបង្ក្រាបគ្រឿងញៀននៅក្លឹបកម្សាន្តរ៉ុក
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាន ប្រកាសថា សូមកុំឱ្យមានអ្នកកាងនៅពីក្រោយខ្នងចំពោះករណីបង្ក្រាបគ្រឿងញៀននៅក្លិបកម្សាន្តរ៉ុកឱ្យសោះ ហើយបើមានទោះបីទោះថ្នាក់ប៉ុន្មានក៏ត្រូវតម្ចាត់ដែរ ។
ថ្លែងក្នុងពិធីបិទសន្និបាតប្រចាំឆ្នាំ២០១៨ និងលើកទិសដៅការងារឆ្នាំ២០១៩របស់ ក្រសួងសុខាភិបាល នារសៀលថ្ងៃទី១២ ខែមីនា ឆ្នាំ២០១៩នេះ នៅសណ្ឋាគារសូហ្វីតែល ភ្នំពេញ សម្ដេចតេជោ ហ៊ុន សែន បានបញ្ជាក់ថា ករណីនៅក្លិបកម្សាន្ដរ៉ុកគឺជាករណី មិនត្រូវ លើកលែងនោះទេ។ ករណីរ៉ុកទោះបីជាត្រូវជីកជម្រៅប៉ុន្មានរយម៉ែត្រ ឬម៉ឺនម៉ែត្រចុះក្នុងដី ដើម្បីរកមេក្លោងក៏ត្រូវជីកឱ្យជ្រៅតាមរកដែរ។ សម្តេចតេជោបានគូសបញ្ជាក់ថា “រកឱ្យឃើញ ព្រោះការបំផ្លិចបំផ្លាញដែលចេញពីកន្លែងនេះគឺធំធេងហួសហេតុពេក ហើយដែលតាមខ្ញុំដឹង នៅសល់មួយកន្លែងទៀត ប៉ុន្តែឥឡូវវាសម្ងំ។ ពេលនោះបើប្រតិបត្តិការម្តងពីរកន្លែងអាចចប់”។
សម្តេចតេជោបានបន្ដថា “អញ្ចឹងសំណុំរឿងមួយនេះ ខ្ញុំត្រូវលូកដៃចូលក្នុងសំណុំរឿង នេះ គឺមិនអាចឱ្យរួចផុតទេ ឧក្រិដ្ឋកម្មមួយ នេះវាធ្ងន់ហួស។ គ្រឿងញៀនបានបំផ្លាញនូវអនាគត របស់យុវជនយើងមិនតិចទេ ហើយនៅរ៉ុកតើបានបំផ្លាញប៉ុន្មានរួចហើយ អញ្ចឹងទេ មិនអាច ផ្តន្ទាទោសត្រឹមអាមេការតូចតាច អាមេបន្ទាប់ និងអាអ្នកជក់នោះទេ ចាប់អាមេវាអាធំ”។
សម្ដេចតេជោបានអះអាងថា រឿងនេះត្រូវតែធ្វើឱ្យបានដាច់ខាត ដោយគ្មានការលើកលែងទេ ហើយសម្ដេចតេជោបានបញ្ជាក់ហើយថា អភិក្រម៥យ៉ាង គឺឆ្លុះកញ្ចក់ ងូតទឹក ដុះក្អែល ព្យាបាល និងវះកាត់។ ទន្ទឹមនេះ មិនមែនធ្វើតែវិស័យរដ្ឋនោះទេ វិស័យឯកជនក៏ត្រូវធ្វើដែរ សង្គមទាំងមូល ត្រូវធ្វើបញ្ហានេះ ដោយគ្មានការលើកលែងណាមួយដែលអាចធ្វើទៅ ហើយរួច បាននោះទេ។ សម្តេចតេជោបានបន្ដទៀតថា បើទោះបីជាជាប់ដល់មន្ត្រីថ្នាក់ណាក៏ដោយ ក៏ត្រូវតែធ្វើដែរ ដែលនៅទីនេះ សម្ដេចធ្លាប់បានលើកឡើងថាត្រឹមអ្នកឯងពាក់ផ្កាយនោះ សូម្បីតែអ្នកពាក់លោកខែ ក៏សម្ដេចដក និងចាប់បានដែរ។ សម្ដេចតេជោបានជំរុញឱ្យ តុលាការស៊ើបអង្កេតឱ្យបានគ្រប់គ្រាន់ ហើយកុំឱ្យអ្នកណាមកជើងកាង ទោះបីជាជើងកាង ចេញមកមួយកងពលក៏ដោយក៏សម្ដេចវាយកម្ទេចចោលទាំងអស់។
សម្ដេចតេជោនាយករដ្ឋមន្រ្ដីក៏បានបន្ថែមទៀតថា “យើងត្រូវចាប់ផ្តើមអំពីសមត្ថភាពរ៉ុក នេះមួយ ដើម្បីបង្ហាញថាមិនមែនតែចាប់តែអាតូចតាចទេ អាមេក្លោងធំប៉ុន្មានក៏ដោយ ទោះបីជាក្នុងវិស័យឯកជន និងក្នុងរដ្ឋ បើទោះបីមានលុយប៉ុន្មាន ស័ក្តិប៉ុន្មានវៃទាំងអស់”៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។