ជនជាតិជប៉ុន២នាក់ ប៉ាវឡានជិះ រួចយកមកប្លន់សម្លាប់ តែរត់មិនរួចត្រូវប្រជាពលរដ្ឋព័ទ្ធចាប់
ខេត្តសៀមរាប ៖ តាមសេចក្តីរាយការណ៍បានឲ្យដឹងថា នៅល្ងាចថ្ងៃទី១៧ ខែមីនា នេះ មានករណីប្លន់អ្នករត់តាក់ស៊ីម្នាក់ ត្រូវគេអារកសំលាប់ ព្រមទាំងកាប់ជាច្រើនកាំបិទ រួចរុញទំលាក់ពីលើរថយន្ត ដើម្បីប្លន់។
ហេតុការណ៍នេះកើតឡើងនៅតាមបណ្តោយផ្លូវជាតិលេខ៦ ម៉ោងប្រមាណ៤ល្ងាច នៅចំនុច ជញ្ជីងថ្លឹងរថយន្តស្រុកពួក ខាងលិចផ្សារពួកចំងាយ៥០០ម៉ែត្រ។
តាមប្រភពបានឲ្យដឹងថា មុនដំបូងមានជនជាតិជប៉ុន ២នាក់ បានជួលឡាន (ប៉ាវឡាន) ជនរងរគ្រោះ ដោយជិះពីស្វាយស៊ីសុផុន មកសៀមរាប ខណះមកដល់ចំនុចកើតហេតុ ជនល្មើសទាំងពីរនាក់បានយកកាំបិទ អារកអ្នកបើករថយន្តតាក់ស៊ី រួចហើយចាក់ជាច្រើនកាំបិទរហូតដល់ស្លាប់ បន្ទាប់មករុញជនរងគ្រោះទំលាក់ចោលពីក្នុងឡាន ហើយបម្រុងបើករត់គេច ប៉ុន្តែជនល្មើសបានបើកទៅបុកគោយន្តកន្រ្តៃ ដាច់ជា២ ហើយរេចង្កូចទៅម្ខាងផ្លូវជ្រុលទៅបុកដើមម៉ាខុបមួយដើម មុខផ្ទះពលរដ្ឋ បណ្តាលឲ្យរថយន្តទៅមុខលែងរួច ខណះនោះត្រូវបានពលរដ្ឋដេញចាប់កាត់វាលស្រែយ៉ាងប្រផាប់ប្រផីញ ប្រគល់ឲ្យសមត្ថកិច្ច។
ពេលនេះជនល្មើសត្រូវបានសមត្ថកិច្ចកំពង់សាកសួរនៅអធិការដ្ឋាននគរបាលស្រុកពួក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។