នាយករដ្ឋមន្រ្តីប្រកាសពីការសាងសង់ស្ពានឆ្លងកាត់ទន្លេសាប ភ្ជាប់ខេត្តកំពង់ឆ្នាំង និងខេត្ដកំពង់ធំ
សម្ដេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសផ្ដល់នូវកាដូឆ្នាំថ្មីជូនដល់ប្រជាពលរដ្ឋខេត្ដកំពង់ឆ្នាំង និងខេត្តកំពង់ធំ នូវការស្ថាបនាស្ពានឆ្លងកាត់ទន្លេសាប និងផ្លូវ ដែលមានប្រវែងជាង ៥៧គីឡូម៉ែត្រ ដើម្បីតភ្ជាប់ប្រព័ន្ធគមនាគមន៍រវាងខេត្តទាំងពីរ ក៏ដូចជាសម្រួលដល់ការធ្វើដំណើរ និងការផ្លាស់ប្ដូរសេដ្ឋកិច្ច លើកកម្ពស់ជីវភាពរស់នៅរបស់ប្រជាពលរដ្ឋ។
ក្នុងខណៈសម្ដេចតេជោអញ្ជើញជាអធិបតី ជាមួយសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងពិធីបើកបុណ្យទន្លេលើកទី៥ ក្រោមប្រធានបទ«ទន្លេ៖ ផ្សារភ្ជាប់សន្តិភាព ប្រជាជន និងទេសចរណ៍» កាលពីរសៀលថ្ងៃទី ១៦ ខែមីនា ឆ្នាំ២០១៩ នៅខេត្តកំពង់ឆ្នាំង សម្ដេច តេជោ ហ៊ុន សែន បានមានប្រសាសន៍ថា ការកសាងដស្ពាននេះ ត្រូវឆ្លងកាត់នូវការសិក្សាឡើងវិញ ដោយក្រសួងសាធារណការ និងដឹកជញ្ជូន ជាមួយនឹងក្រុមហ៊ុនសាងសង់ ដែល ថ្ងៃនេះសម្ដេចតេជោសូមប្រកាសទៅកាន់ប្រជាពលរដ្ឋនៅខេ្តតកំពង់ឆ្នាំង និងខេត្តកំពង់ធំថា សម្ដេចសម្រេចចិត្ត ផ្ដល់ការអនុញាតឱ្យសាងសង់ ស្ពាន និងផ្លូវតភ្ជាប់រវាងខេត្តកំពង់ឆ្នាំង ទៅខេត្តកំពង់ធំ។
សម្ដេចតេជោបានថ្លែងថា ផ្លូវនេះមានចម្ងាយជាង៥៧គីឡូម៉ែត្រ ដែលតភ្ជាប់ពីស្រុកកំពង់លែងនៃខេត្ដកំពង់ឆ្នាំង ទៅកាន់ក្រុងស្ទឹងសែន នៃខេត្តកំពង់ធំ ហើយដែលយើង ត្រូវធ្វើស្ពានដែលវែងជាងគេនៅក្នុងប្រទេសកម្ពុជារបស់យើង ដែលស្ពាននេះមានប្រវែងរហូតទៅដល់ ៣.៩០០ម៉ែត្រ ដែលឆ្លងដៃទន្លេទាំងបី គឺទីមួយ ទន្លេសាបក្រោម ទីពីរ ទន្លេជ្រោយបុស្ស និងទីបី ទន្លេកំពង់ហាវ។ នេះគឺជាការធ្វើស្ពាន ដើម្បីកំឱ្យមានការប៉ះពាល់ទៅលើការចរាចរណ៍ផ្លូវទឹក ក៏ដូចជាទាក់ទងទៅនឹងចរាចរណ៍មច្ឆាជាតិ។ ឯចំណែកផ្នែកខាងលើគឺពុំមានផលប៉ះពាល់នោះទេ ដោយសារមានតួផ្លូវរួចស្រេចហើយ។
សម្ដេចតេជោថ្លែងទៀតថា ចំណុចនេះវាមិនគ្រាន់តែជាផលប្រយោជន៍របស់អ្នកខេត្តកំពង់ឆ្នាំង និងអ្នកខេត្តកំពង់ធំទេ ក៏ប៉ុន្តែសម្រាប់ប្រជាជននៅទូទាំងប្រទេស បន្ទាប់ពីស្ពាន និងផ្លូវមួយខ្សែនេះបានសាងសង់រួចរាល់។ សម្ដេចតេជោសង្ឃឹមថា ប្រជាពលរដ្ឋរបស់យើង និងទទួលបាននូវផលប្រយោជន៍ ពីគម្រោងមួយនេះ ដែលយើងបានសិក្សាជាក់លាក់រួចមកហើយថា មិនមានផលប៉ះពាល់ ណាមួយបំផ្លាញទៅដល់ធនធានធម្មជាតិ ឬក៏បង្វែរចរន្តទឹក ដែលនឹងធ្វើឱ្យស្ទះនូវចរាចរណ៍ផ្លូវទឹក និងការបម្លាស់ទីរបស់មច្ឆាជាតិនោះទេ។ នេះជាការដូរឆ្នាំថ្មីជូនប្រជាពលរដ្ឋខេត្តកំពង់ឆ្នាំង និងខេត្តកំពង់ធំ។
បើតាមការលើកឡើងរបស់ឯកឧត្ដម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានគូសបញ្ជាក់ថា គម្រោងសាងសង់ផ្លូវ ស្ពានជាប្រវត្តិសាស្ត្រននេះ រួមមានការសាងសង់ផ្លូវប្រវែង៥៧គីឡូម៉ែត្រ និងស្ពានឆ្លងកាត់បឹងទន្លេសាបជិត៤គីឡូម៉ែត្រ បានសិក្សាលំអិតរួចរាល់អស់ហើយ នៅតែរង់ចាំថវិកាប៉ុណ្ណោះ ដែលគ្រោងចំណាយថវិកាប្រមាណជាង២០០លានដុល្លារអាម៉េរិក អាចនឹងប្រើថវិកាកម្ចីរបស់ប្រទេសចិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។