កម្ពុជានឹងខ្វះខាតអគ្គិសនី៤០០មេហ្គាវ៉ាត់ នៅក្នុងរដូវប្រាំងនេះ
សម្តេច ហ៊ុន សែន បានលើកឡើងនៅក្នុងឱកាសពិធីបើកបុណ្យទន្លេនៅខេត្តកំពង់ឆ្នាំង កាលពីចុងសប្តាហ៍នេះថា កត្តាប្រែប្រួលអាកាសធាតុ បានធ្វើឲ្យកម្ពុជាជួបប្រឈមនឹងបញ្ហាគ្រោះរាំងស្ងួត ដែលមានរយៈពេលរហូតដល់ខែមិថុនា ឆ្នាំ២០១៩ ដែលនេះ ធ្វើឲ្យកម្ពុជាជួបបញ្ហាខ្វះខាតភ្លើងប្រើប្រាស់រហូតដល់ ៤០០មេហ្គាវាត់ ដែលទំហំនេះអាចនឹងកើនឡើងថែមទៀត។
សូមបញ្ជាក់ថា វារីអគ្គីសនីដែលកម្ពុជាមានសព្វថ្ងៃនេះ គឺដំណើរការបានដោយមានទឹកប្រើប្រាស់គ្រប់គ្រាន់។ ដូច្នេះប្រសិនបើមិនមានទឹកគ្រប់គ្រាន់ទេ គឺវារីអគ្គិសនីនឹងប្រឈមបញ្ហាផលិតថាមពលអគ្គីសនីមិនខាន។
សម្តេច ហ៊ុន សែន បន្តថា នៅពេលនេះ រាជរដ្ឋាភិបាលកម្ពុជាបាននឹងកំពុងខិតខំដោះស្រាយបញ្ហាដោយបន្ថែមម៉ាស៊ីនភ្លើងជាច្រើនគ្រឿងដើម្បីចែកចាយភ្លើង។ វិធានការជាបន្ទាន់នៅពេលនេះ គឺដើម្បីជំរុញឱ្យសង្វាក់ផលិតកម្មទាំងអស់ ពិសេសផលិតកម្មម៉ាស៊ីនកិនស្រូវ អាចបន្តដំណើរការកែច្នៃផលិតផលស្រូវអង្ករទៅបាន ជៀសវាងទទួលរងនូវផលប៉ះពាល់នានា។
ជាមួយគ្នានេះ សម្តេចក៏បានអំពាវនាវឲ្យប្រជាពលរដ្ឋទូទាំងប្រទេស និងអាជីវករទាំងអស់ យោគយល់ អធ្យាស្រ័យក្នុងករណីដែលនៅទីកន្លែងខ្លះមានដាច់ភ្លើង និងការខ្វះភ្លើងប្រើ ព្រមទាំងស្នើឲ្យប្រើប្រាស់ភ្លើងដោយសន្សំសំចៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។