ឆ្នាំនេះ អត់មានព្រឹត្តិការណ៍អង្គរសង្ក្រាន្តទេ ប៉ុន្តែមានសៀមរាបសង្ក្រាន្ត
អភិបាលខេត្តសៀមរាប បានថ្លែងថា ឆ្នាំនេះសហភាពសហព័ន្ធយុវជនកម្ពុជា មិនបានរៀបចំព្រឹត្តិការណ៍អង្គរសង្ក្រាន្តនៅក្នុងតំបន់រមណីយដ្ឋានអង្គរនោះទេ ប៉ុន្តែសហភាពសហព័ន្ធយុវជនខេត្តសៀមរាបសហការជួយអាជ្ញាធរខេត្ត និងស្ថាប័នពាក់ព័ន្ធ នឹងរៀបចំព្រឹត្តិការណ៍សៀមរាបសង្ក្រាន្ត ដើម្បីអបអរសាទរបុណ្យចូលឆ្នាំថ្មី ប្រពៃណីជាតិខ្មែរ ដោយមានកម្មវិធីសាសនា និងល្បែងប្រជាប្រិយ៍ជាច្រើន សម្រាប់ឲ្យប្រជាពលរដ្ឋ និងភ្ញៀវទេសចរចូលលេងកម្សាន្តនៅតំបន់ព្រះអង្គចេកព្រះអង្គចម។
លោក ទៀ សីហា អភិបាលខេត្តសៀមរាប បានបញ្ជាក់ថា បើទោះព្រឹត្តិការណ៍អង្គរសង្ក្រាន្តឆ្នាំនេះ មិនបានធ្វើប៉ុន្តែសូមបងប្អូនមកកម្សាន្តសប្បាយនៅខេត្តសៀមរាបដូចឆ្នាំមុនៗទៀត ព្រោះនៅខេត្តសៀមរាប មានរៀបចំសៀមរាបសង្ក្រាន្ត ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរ ដោយមានកម្មវិធីសាសនា និងល្បែងប្រជាប្រិយ៍ជាច្រើន។
លោកអភិបាលខេត្ដបន្ដថា ក្រៅពីនេះបងប្អូនអាចទៅកម្សាន្តនៅតាមប្រាសាទបុរាណ រមណីយដ្ឋានធម្មជាតិជាច្រើន សម្បូរបែបទៀត ដែលមាននៅក្នុងខេត្តទេសចរណ៍មួយនេះ។
សូមបញ្ជាក់ថា សហភាពសហព័ន្ធយុវជនកម្ពុជាសហការជាមួយស្ថាប័នជាតិច្រើន បានរៀបចំព្រឹត្តិការណ៍អង្គរសង្ក្រាន្តរយៈពេល៦ឆ្នាំមកហើយ គឺចាប់ពីតាំងពីឆ្នាំ២០១៣មកម្លេះ ហើយព្រឹត្តិការណ៍កន្លងមកនេះ បានបង្ហាញអំពីវប្បធម៌ដ៏សម្បូរបែបរបស់កម្ពុជាដែលមាននៅ គ្រប់ទីកន្លែង ហើយដែលបច្ចុប្បន្នកំពុងត្រូវបានយកចិត្តទុកដាក់ស្រាវជ្រាវ រុករកយកមកថែរក្សា និងអភិវឌ្ឍន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។