ទំនិញ៣២មុខ នឹងមិនត្រូវគិតពន្ធទេពេលនាំចូលទៅកាន់ប្រទេសវៀតណាម
យោងតាមសេចក្តីជូនដំណឹងរបស់ក្រសួងពាណិជ្ជកម្មកម្ពុជាបានឲ្យដឹងថា ក្រោមកិច្ចសម្របសម្រួលជំរុញពាណិជ្ជកម្មទ្វេភាគី រវាងរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល នៃសាធារណរដ្ឋសង្គមនិយមវៀតណាម ដែលបានចុះហត្ថលេខាកាលពីថ្ងៃទី២៦ ខែកុម្ភៈ ឆ្នាំ២០១៩ ទំនិញពីប្រទេសកម្ពុជាចំនួន៣២មុខ នឹងមិនត្រូវគិតពន្ធឡើយ ពេលនាំចូលទៅកាន់ប្រទេសវៀតណាម ដោយអនុវត្តពីឆ្នាំ២០១៩នេះ រហូតដល់ឆ្នាំ២០២០។
ទំនិញទាំងនោះរួមមាន បសុបក្សីរស់ ដូចជាទា ក្ងាន មាន់, សាច់ និងបំណែកសាច់ដែលអាចបរិភោគបានរបស់បសុបក្សី, ផ្លែឈើពពួកក្រូចស្រស់ ឬក្រៀម, ក្រូចឆ្មា, ស្រូវ, អង្ករសំរូប, នំប៉័ង និងថ្នាំជក់ជាដើម។
សម្រាប់ផលិតករ ឬអ្នកនាំចេញ ដែលបាននិងកំពុងប្រកបអាជីវកម្ម ទាក់ទងនឹងមុខទំនិញទាំងនេះ មានបំណងនាំចេញទៅប្រទេសវៀតណាម ដែលទទួលបានភាពអនុគ្រោះពន្ធសូន្យភាគរយ ត្រូវស្នើសុំវិញ្ញាបនបត្របញ្ជាក់ដើមកំណើតទំនិញតាមរយៈគេហទំព័រ co.moc.gov.kh ។
ដោយឡែកសម្រាប់បរិមាណមុខទំនិញសន្លឹកថ្នាំជក់ និងអង្ករ សម្រាប់អនុវត្តឆ្នាំ២០១៩ សូមផលិតករ ឬអ្នកនាំចេញ ដាក់ពាក្យស្នើសុំមកនាយកដ្ឋាននាំចេញ-នាំចូល នៃអគ្គនាយកដ្ឋានសេវាពាណិជ្ជកម្ម នៃ ក្រសួងពាណិជ្ជកម្ម រៀងរាល់ម៉ោងធ្វើការ ចាប់ពីថ្ងៃផ្សាយដំណឹងនេះ រហូតដល់ថ្ងៃទី៨ ខែមេសា ឆ្នាំ២០១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។