ឯកអគ្គរាជទូតជប៉ុននៅកម្ពុជា ចេញសារចូលរួមរំលែកទុក្ខគ្រួសារនៃសព ករណីប្លន់សម្លាប់
ក្រោយពីហេតុការណ៍ដ៏រន្ធត់មួយ បានកើតឡើងដោយសារបុរសជនជាតិជប៉ុន២នាក់ បានប្លន់សម្លាប់បុរសរត់តាក់ស៊ីម្នាក់ ដោយអាករសម្លាប់រួចទម្លាក់សពពីរថយន្ត ហើយជិះគេចខ្លួន ប៉ុន្តែសំណាងមិនល្អក៏ជ្រុលទៅបុកគោយន្តកន្ត្រៃ បណ្តាលអោយរថយន្តទៅមុខលែងរួច ក៏ចុះរត់គេចខ្លួន តែត្រូវបានសមត្ថកិច្ចឃាត់ខ្លួនបានភ្លាមៗ នោះមានសារព័ត៌មានជប៉ុនមួយឈ្មោះ Fuji News Network បានចុះមកយកព័ត៌មានផ្ទាល់ដល់ទីកន្លែង ផ្សាយអោយដឹងថា ដើមហេតុនាំឲ្យមានការប្លន់សម្លាប់នេះ ដោយសារតែជនសង្ស័យ២រូបនេះ ជាប់ជំពាក់បំណុលរហូតដល់ទៅ៤លានយេន(ប្រាក់ជប៉ុន) ប្រមាណជា៣ម៉ឺន៥ពាន់ដុល្លារអាមេរិក ។
នៅល្ងាចថ្ងៃទី២០ មីនា ២០១៩ នេះតាមរយៈផេកហ្វេសប៊ុកផ្លូវការណ៍របស់ស្ថានទូតជប៉ុននៅកម្ពុជា ឧត្តមឯកអគ្គរាជទូត Horinouchi បានចេញសារចូលរួមរំលែកទុក្ខ យ៉ាងដូច្នេះថា «ខ្ញុំពិតជាក្រៀមក្រំនៅពេលដែលបានឮដំណឹងថា អ្នកបើកបររថយន្តឈ្នួល លោក ហ៊ឹម ចាន់ ត្រូវជនជាតិជប៉ុនពីររូប សម្លាប់កាលពីថ្ងៃទី១៧ ខែមីនា ឆ្នាំ២០១៩។ ខ្ញុំសូមចូលរួមរំលែកទុក្ខយ៉ាងក្រៀមក្រំចំពោះក្រុមគ្រួសាររបស់លោក ។ សូមវិញ្ញាណក្ខន្ធលោកទៅកាន់សុគតិភព» ។
ជាមួយគ្នានេះដែរ ក៏មានជនបរទេសម្នាក់ឈ្មោះថា Michael Hartzsch បានផ្តួចផ្តើមបង្កើតជាមូលនិធិមួយ ដើម្បីជួយដល់ក្រុមគ្រួសារជនរងគ្រោះ ហើយក្នុងនោះ គេសង្កេតឃើញ មានជនជាតិជប៉ុនជាច្រើន បាននាំគ្នាបរិច្ចាគថវិការ ដើម្បីជួយដល់ក្រុមគ្រួសារជនរងគ្រោះ ដោយទំហំទឹកប្រាក់មូលនិធិ ត្រូវបានកំណត់ត្រឹម ៥,០០០ដុល្លារ តែប៉ុណ្ណោះ ។ ត្រឹមរយៈពេល២៤ម៉ោង មានអ្នកបរិច្ចាគ មានទាំងជនជាតិខ្មែរ និងជប៉ុន បានទឹកប្រាក់ចំនួនជិត ២,០០០ដុល្លារហើយ អ្វីដែលពិសេសមានជនជាតិជប៉ុនជាច្រើន បានបង្ហោះសារសោកស្តាយយ៉ាងខ្លាំង ចំពោះរឿងមួយនេះ ហើយក្នុងនោះក៏មានបុរសជនជាតិជប៉ុនម្នាក់ឈ្មោះថា Tomohiro Isida បានរៀបរាប់ថា «ខ្ញុំពិតជាមានភាពអាម៉ាស់ខ្លាំងណាស់ ក្នុងនាមជាជនជាតិជប៉ុនមួយរូប ហើយសូមមេត្តាកុំស្អប់ជប៉ុនអី» ។
ដោយឡែក លោក Akihiro Kato ម្ចាស់ក្លឹបបាល់ទាត់ ខេមបូឌានថាយហ្គឺ (Camboda Tiger) និងកីឡាករបាល់ទាត់អាជីព ជនជាតិជប៉ុន បានរួមគ្នាប្រមូលថវិការជួយគ្រួសារជនរងគ្រោះដែលត្រូវបាន ជនជាតិជប៉ុន២នាក់សម្លាប់ ដែលទឹកប្រាក់បរិច្ចាគ មានចំនួន៤,០០០ដុល្លារសហរដ្ឋអាមេរិក ។
ក្នុងឱកាសយកថវិការទៅជូនគ្រួសារសពជនរងគ្រោះលោក Akihiro Kato ក៏បានបង្ហោះសារថា «យើងបានបរិច្ចាគថវិការចំនួន ៤,០០០ដុល្លារ ជូនទៅដល់គ្រួសារជនរងគ្រោះ ហើយក៏អរគុណដល់មិត្តភក្រ័ និងកីឡាករបាល់ទាត់អាជីពជនជាតិជប៉ុនទាំងអស់ នៅក្នុងក្លឹបបាល់ទាត់នៅកម្ពុជា ដែលបានចូលរួមគ្នាក្នុងការបរិច្ចាគថវិការទាំងនេះ ។ ខ្ញុំពិតជាសោកស្តាយណាស់ចំពោះហេតុការណ៍នេះ ។ ខ្ញុំសូមឲ្យវិញ្ញាណក្ខន្ធលោកទៅកាន់សុគតិភព» ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។