ភ្ញៀវទេសចររាប់ពាន់នាក់ ចាប់អារម្មណ៍ទស្សនាព្រះអាទិត្យរះចំកំពូលកណ្តាលនៃប្រាសាទអង្គវត្តនៅព្រឹកមិញ
ភ្ញៀវទេសចរចម្រុះជាតិសាសន៍ រាប់ពាន់នាក់ បានធ្វើដំណើរមកកាន់ប្រាសាទអង្គរវត្ត តាំងពីវេលាទៀបភ្លឺថ្ងៃទី ២១ ខែមីនា ឆ្នាំ២០១៩នេះ ដើម្បីមកទស្សនាព្រះអាទិត្យរះឡើងចំកំពូលកណ្តាលនៃប្រាសាទបុរាណមួយនេះ ។
អ្នកទេសចរទាំងនោះ បាននាំគ្នាមកឈរត្រៀបត្រា នៅរានហាលខាងក្នុងនៃប្រាសាទអង្គរវត្ត ដើម្បីផ្តិតយករូបភាពដ៏កម្រ ដែលកើតមានតែ២ដងប៉ុណ្ណោះក្នុង១ឆ្នាំៗ។
ពាក់ព័ន្ធនឹងព្រឹត្តិការណ៍នេះ លោក អ៊ឹម សុខរិទ្ធី អ្នកស្រាវជ្រាវបុរាណវិទ្យា និង ជាអនុប្រធានមជ្ឈមណ្ឌលអន្តរជាតិស្រាវជ្រាវ និង តម្កល់ឯកសារអង្គរ នៃអាជ្ញាធរជាតិអប្សរា បានឲ្យដឹងថា សម្រាប់ព្រឹត្តិការណ៍ថ្ងៃរះកំពូលកណ្តាលនៃប្រាសាទអង្គរវត្តនេះ សម្រាប់ព្រឹកថ្ងៃទី២១ ខែមីនា ឆ្នាំ២០១៩នេះ គឺរះចំល្អ ។ ប៉ុន្តែលោកពន្យល់ថា មិនមែនរះចំតាំងពីក្រោមរហូតដល់លើនោះទេ គឺថ្ងៃរះដំបូងនៅឈៀងខាងត្បូង ឬខាងស្តាំកំពូលកណ្តាលបន្តិចរហូតដល់កំឡុងម៉ោង៦និង៣០នាទីទើបថ្ងៃនេះបានរំកិលទៅចំពីលើកំពូលកណ្តាលនៃប្រាសាទអង្គរវត្ត ហើយការរះចំកំពូលកណ្តាលប្រាសាទអង្គរវត្តនេះ គឺមានរយៈពេលតែប្រមាណ៥០វិនាទីប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។