អគ្គនាយក​ដ្ឋាន​គយ​ ​រៀបចំ​បណ្តុះបណ្តាល​មន្រ្តី​ពី​ ​តម្លៃ​គិត​ពន្ធគយ​

ថ្ងៃទី២៥​ ​ខែមីនា​ ​ឆ្នាំ២០១៩​ ​នៅ​សណ្ឋាគារ​សុខា​ ​រាជធានី​ភ្នំពេញ​ ​អគ្គនាយក​ដ្ឋាន​គយ​និង​រដ្ឋាករ​កម្ពុជា​ ​បាន​រៀបចំ​វគ្គ​បណ្តុះបណ្តាល​ស្តី​ពី​ ​“​តម្លៃ​គិត​ពន្ធគយ​”​ក្រោម​អធិបតីភាព​របស់​លោក​ ​នួន​ ​ច័ន្ទ​រិទ្ធ​ ​អគ្គនាយករង​ ​នៃ​អគ្គនាយក​ដ្ឋាន​គយ​ ​និង​រដ្ឋាករ​កម្ពុជា​ ​ជា​តំណាង​ដ៏​ខ្ពង់ខ្ពស់​របស់​ឯកឧត្តម​បណ្ឌិត​ ​គុណ​ ​ញឹម​ ​ប្រតិភូ​រាជរដ្ឋាភិបាល​ទទួលបន្ទុក​ជា​អគ្គនាយក​ ​នៃ​អគ្គនាយក​ដ្ឋាន​គយ​និង​រដ្ឋាករ​កម្ពុជា​។​

​វគ្គ​បណ្តុះបណ្តាល​នេះ​ប្រព្រឹត្តទៅ​ចាប់ពី​ថ្ងៃទី២៥​ ​ដល់​ថ្ងៃទី២៦​ ​ខែមីនា​ ​ឆ្នាំ២០១៩​ ​ក្នុង​គោលបំណង​លើកកម្ពស់​សមត្ថភាព​ ​និង​ចំណេះដឹង​របស់​មន្រ្តី​គយ​និង​រដ្ឋាករ​កម្ពុជា​ ​លើ​ផ្នែក​បច្ចេកទេស​តម្លៃ​គិត​ពន្ធគយ​ដោយមាន​ការចូលរួម​ពី​មន្ត្រី​ពី​បណ្តា​អង្គភាព​គយ​និង​រដ្ឋាករ​មូលដ្ឋាន​នានា​ ​ចំនួន​ ​៦១​ ​រូប​។​

​ថ្លែង​ក្នុង​ពិធី​បើក​វគ្គ​បណ្តុះបណ្តាល​ ​លោក​ ​នួន​ ​ច័ន្ទ​រិទ្ធ​ ​បាន​គូសបញ្ជាក់​ថា​ការងារ​កំណត់​តម្លៃ​គិត​ពន្ធគយ​នេះ​ជា​កត្តា​គន្លឹះ​ក្នុង​ការ​គាំទ្រ​ចូលរួម​ចំណែក​ដល់​ការ​ប្រមូល​ពន្ធអាករ​បាន​ត្រឹមត្រូវ​ប្រក​ដោយ​សមធម៌​។​ ​ជាមួយ​នេះ​ដែរ​ ​វគ្គ​បណ្តុះបណ្តាល​លើ​ប្រធានបទ​នេះ​ ​មាន​ភាព​ចាំបាច់​ដែល​ត្រូវ​ធ្វើឡើង​ជាប់​ជាប្រចាំ​ដើម្បី​ពង្រឹង​សមត្ថភាព​មន្រ្តី​ជំនាញ​ ​ក៏ដូចជា​ចូលរួម​ចំណែក​ក្នុង​ការ​បង្កើន​ប្រសិទ្ធភាព​នៃ​ការ​កៀរគរ​ចំណូល​គយ​ ​ក៏ដូចជា​សម្រេច​តាម​យុទ្ធសាស្ត្រ​កែទម្រង់​និង​ទំនើបកម្ម​គយ​ឆ្នាំ២០១៩​-​២០២៣​។​ ​វគ្គ​បណ្តុះបណ្តាល​នេះ​គឺជា​ឱកាសល្អ​សម្រាប់​សិក្ខាកាម​ទាំងអស់​ទទួល​បាន​នូវ​ពុទ្ធិ​ថ្មី​ៗ​ ​តាមរយៈ​ការចែក​រំលែក​ចំណេះដឹង​ ​និង​បទពិសោធន៍​ស្របតាម​ការ​វិ​វត្ត​ថ្មី​ៗ​ពាក់ព័ន្ធ​នឹង​ការងារ​ផ្ទៀងផ្ទាត់​តម្លៃ​គិត​ពន្ធគយ​ដែល​រួមមាន​ ​៖​ ​បទប្បញ្ញត្តិ​ពាក់ព័ន្ធ​នឹង​តម្លៃ​គិត​ពន្ធគយ​,​ ​វិធីសាស្ត្រ​កំណត់​តម្លៃ​គិត​ពន្ធគយ​,​ ​លក្ខខណ្ឌ​ទិន្នន័យ​អប្បបរមា​នៅ​លើ​វិក្កយបត្រ​ ​និង​ការ​ធ្វើលំ​ហាត់​អនុវត្ត​ផ្ទាល់​។​ ​បន្ថែម​ពីនេះ​ ​លោក​អគ្គនាយករង​ក៏បាន​លើកទឹកចិត្ត​ដល់​សិក្ខាកាម​ទាំងអស់​ឲ្យ​ចូលរួម​សកម្ម​ក្នុង​ការសិក្សា​ស្វែងយល់​ ​ពិភាក្សា​ ​និង​ចែករំលែក​នូវ​បទពិសោធន៍​ទៅវិញទៅមក​ក្នុង​គោលបំណង​ដើម្បី​ទទួល​បាន​នូវ​លទ្ធផល​ផ្លែផ្កា​ដ៏​ល្អ​ពី​វគ្គ​បណ្តុះបណ្តាល​នេះ​ ​ដើម្បី​យក​ទៅ​បំពេញការងារ​ជាក់ស្តែង​ឲ្យ​កាន់តែ​មានប្រសិទ្ធភាព​៕​

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

Close