សំណុំរឿងឧកញ៉ា អ៊ឹង ម៉េងជឺ បិទបញ្ចប់ តុលាការផ្ដន្ទាទោសក្រុមលោក ថោង សារ៉ាត់ ដាក់ពន្ធនាគារអស់មួយជីវិត
រាជធានីភ្នំពេញ ៖ ទីបំផុតទៅ នៅល្ងាចថ្ងៃទី២៦ ខែមីនា នេះ ក្រុមប្រឹឹក្សាជំនុំជំរះសាលាដំបូងរាជធានីភ្នំពេញ បានប្រកាសសាលក្រមសម្រេចផ្ដន្ទាទោសលោក ថោង សារ៉ាត់ និងបក្សពួក ដាក់ពន្ធនាគារអស់មួយជីវិត ក្រោមបទចោទប្រកាន់ពីបទឃាតកម្មគិតទុកជាមុន តាមមាត្រា២០០ នៃក្រមព្រហ្មទណ្ឌ ពាក់ព័ន្ធនឹងអំពើឃាតកម្មលើឧកញ៉ា អុឹ ម៉េងជឺ ម្ចាស់ថៅកែស៊ីម៉ង់ត៌ត្បូងពេជ្រ។
សេចក្ដីសម្រេចនេះធ្វើឡើងដោយកំបាំងមុខជនជាប់ចោទ ថោង សារ៉ាត់ តែចាត់ទុកជាចំពោះមុខ បើកផ្លូវប្ដឹងឧទ្ធរណ៍តាមកំណត់ច្បាប់។
ក្រោយស្ដាប់សេចក្ដីសម្រេចរបស់តុលាការហើយ ទាំងជនត្រូវចោទដែលនាំមកស្ដាប់សាលក្រមរួមទាំងសាច់ញាតិបានយំននៀលពេញបន្ទប់សវនាការស្រែកថាអយុត្តិធ័ម ។
គួររំលឹកថា ក្នុងសំណុំរឿងឃាតកម្មលើលោកឧកញ៉ា អុឹង ម៉េងជឺ តុលាការបានចោទប្រកាន់ទី១ឈ្មោះ ថោង សារ៉ាត់ ភេទប្រុស អាយុ៣៨ឆ្នាំ ថៅកែក្រុមហ៊ុន ៩៩៩ ជាប់ចោទពីបទ ផ្តើមគំនិតក្នុងអំពើឃាតកម្មគិតទុកជាមុន ។ ទី២ឈ្មោះ សៀង វាសនា ភេទប្រុស អាយុ ៤៤ឆ្នាំ និងទី៣ឈ្មោះ លី សៅ ហៅវី ភេទប្រុស អាយុ ៤២ឆ្នាំ (ស្លាប់) ជាប់ចោទពីបទ ឃាតកម្មគិតទុកជាមុន ។ ទី៤ឈ្មោះ កូយ ចាន់ថុល ភេទប្រុស អាយុ ២៩ឆ្នាំ ទី៥ឈ្មោះ មាស សម្បត្តិ ភេទប្រុស អាយុ ២៧ឆ្នាំ និងទី៦ឈ្មោះ ឈុន ចិត្រា ភេទប្រុស ជាប់ចោទពីបទ សមគំនិតក្នុងអំពើឃាតកម្មគិតទុកជាមុន។
សូមរំលឹកថា ជនរងគ្រោះមានឈ្មោះ អ៊ឹង ម៉េងជឺ ថៅកែក្រុមហ៊ុន ស៊ីម៉ងតិ៍ពេជ្រ ត្រូវឃាតករបាញ់សម្លាប់ កាលពីម៉ោងប្រមាណជាង៧ល្ងាចថ្ងៃទី២២ ខែវិច្ឆិកា ឆ្នាំ២០១៤កន្លងទៅនៅមុខតូបលក់ផ្លែឈើស្រស់យីហោ ឡោ តិចសេង ក្បែរផ្សារអូឡាំពិក។
ក្នុងសវនាការចំនួន២២លើកកន្លងទៅក្រុមជនជាប់ចោទបានបដិសេធថា ពួកគេមិនជាប់ពាក់ព័ន្ធ និងការសម្លាប់លោកឧកញ៉ា អុឹង ម៉េងជឺ ទេ ប៉ុន្តែពួកគេមិនមានភស្តុតាងដោះបន្ទុកទាល់តែសោះ ។
គួររំឮកដែរថា ជនជាប់ចោទឈ្មោះ ថោង សារ៉ាត់ និងឈ្មោះ ថោង ចំរើន (ជាឪពុក) និងឈ្មោះ កែវ សារី (ជាម្តាយ) ក៏ធ្លាប់ត្រូវបានលោក ឃី ឆៃ ចៅក្រមសាលារាជធានីភ្នំពេញ សម្រេចផ្តន្ទាទោស ដាក់ពន្ធនាគារ ពី២ឆ្នាំ ទៅ២ឆ្នាំកន្លះ និងពិន័យជាប្រាក់ក្នុងម្នាក់ៗ ៦លានរៀលចូលជាថវិការដ្ឋ ក្រោមបទចោទប្រកាន់ កាន់កាប់អាវុធដោយគ្មានការអនុញ្ញាត យោងតាមមាត្រា ៤៩០ នៃក្រមព្រហ្មទណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។