ស្ងាត់ៗ ឧកញ៉ា គិត ធៀង ត្រូវបញ្ជូនចេញពីគុកប៉េហ្សុី
ប្រភពព័តិមានពីសាលាដំបូងរាជធានីភ្នំពេញបានឲ្យដឹងថា លោកឧកញ៉ា គិត ធៀង ម្ចាស់អាជីវកម្មក្លឹបកំសាន្តរ៉ុកដែលពាក់ព័ន្ធនឹងករណីគ្រឿងញៀន ត្រូវបានបញ្ជូនពីគុកប៉េហ្សុីភ្នំពេញមកកាន់មន្ទីរពេទ្យរូស្សុីកាលពីយប់មិញ ដោយមូលហេតុបញ្ហាសុខភាព ។
កងកម្លាំងឆ្នាំគុកមួយចំនួនត្រូវបានបញ្ជូនមកកាន់មន្ទីរពេទ្យរូស្សុីដើម្បីយាមកាម បង្កាខ្លាចមានបញ្ហាកើតឡើងដូចករណីមេភេរវកម្ម សោម ឯក បានលួចរត់ពេលបញ្ជូនពីគុកប៉េហ្សុីមកកាន់មន្ទីរពេទ្យរូស្សុីកាលពីឆ្នាំ២០១៨កន្លងទៅ ។
លោកស្រីមេធាវី ពឹង ធីតា បានដាក់ពាក្យសុំទៅព្រះរាជអាជ្ញាអមសាលាដំបូងរាជធានីភ្នំពេញ ស្នើសុំឲ្យឧកញ៉ា គិត ធាង ចេញពីពន្ធនាគារ PJ មកដេកពេទ្យរុស្ស៊ីវិញ ដោយសារមានបញ្ហាឈឺសួត ។
គួររំលឹកថា លោក សេង លាង ចៅក្រមស៊ើបសួរសាលាដំបូងរាជធានីភ្នំពេញ បានចេញដីកាបង្គាប់ឲ្យឃុំខ្លួនអ្នកឧកញ៉ាគិត ធាង ដាក់ពន្ធនាគារ PJ បណ្តោះអាសន្ន កាលពីរសៀលថ្ងៃទី១២ ខែមីនា ឆ្នាំ២០១៩ពីបទសម្រួលឲ្យមានការប្រើប្រាស់គ្រឿងញៀន ដោយខុសច្បាប់ តាមមាត្រាមាត្រា៤៤ ច្បាប់ស្តីពីការត្រួតពិនិត្យគ្រឿងញៀន។
មាត្រា៤៤ កថាខណ្ឌទី២ ច្បាប់ស្តីពីការត្រួតពិនិត្យ គ្រឿងញៀនចែងថា អំពើជួលទីកន្លែង ផ្តល់ទីកន្លែង ឬ អំពើផ្សេងទៀត បង្កលក្ខណៈងាយស្រួល ដល់ការប្រើប្រាស់ ដោយខុសច្បាប់នូវសារធាតុញៀន គឺជាបទសម្រួលឲ្យប្រើប្រាស់ ដោយខុសច្បាប់នូវសារធាតុញៀន ត្រូវផ្តន្ទាទោសពី៥ឆ្នាំទៅ១០ឆ្នាំ និងពិន័យជាប្រាក់ពី ១០លានរៀល ទៅ២០លានរៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។