រដូវប្រាំងមកដល់ហើយ រដ្ឋបាលរាជធានីភ្នំពេញអំពាវនាវឲ្យពលរដ្ឋបង្ការគ្រោះអគ្គិភ័យ
រដ្ឋបាលរាជធានីភ្នំពេញ កាលពីល្ងាចថ្ងៃទី៣ ខែមេសា បានធ្វើការអំពាវនាវទៅដល់បងប្អូនប្រជាពលរដ្ឋទាំងអស់ ត្រូវម្ចាស់ការ និងប្រុងប្រយ័ត្នខ្ពស់ចំពោះដើមចម ដែលអាចបង្កើតឲ្យមានគ្រោះអគ្គិភ័យដែលអាចកើតមានឡើងជាយថាហេតុ។
រដ្ឋបាលរាជធានីភ្នំពេញបានលើកឡើងថា តាមការព្យាករណ៍ឧតុនិយមបានឲ្យដឹងថា អាកាសធាតុនៅប្រទេសកម្ពុជានឹងឡើងកម្តៅរហូតដល់លើស៤០អង្សារ ចាប់ពីពេលនេះតទៅ រហូតដល់រយៈពេលប្រមាណពីរខែទៅមុខទៀត ដែលធ្វើឲ្យអកាសធាតុក្តៅស្ងួតហួតហែង ងាយបណ្តាលឲ្យកើតគ្រោះអគ្គិភ័យ។
អាស្រ័យហេតុនេះ រដ្ឋបាលរាជធានីភ្នំពេញ អំពាវនាវដល់បងប្អូនប្រជាពលរដ្ឋ ត្រូវប្រុងប្រយ័ត្នចំពោះដើមចមនៃអគ្គិភ័យដូចជា ភ្លើងចង្រ្កាន ភ្លើងចង្កៀង ភ្លើងធូប-ទៀន ការដុតសំរាម ដុតព្រៃ ចំការ វាលស្រែ ការបោះចោលកន្ទុយបារីផ្តេសផ្តាស ការតភ្ជាប់ ឬប្រើចរន្តអគ្គិសនីមិនត្រឹមត្រូវតាមបច្ចេកទេស ការទុកដាក់ប្រេងឥន្ធនៈ ឧស្ម័នចំហេះ វត្ថុងាយឆេះ ឬងាយផ្ទុះឆេះ។ល។ ដោយត្រូវពិនិត្យឲ្យបានហ្មត់ចត់ បង្ការកុំឲ្យមានការឆេះរាលដាលបង្កើតជាគ្រោះអគ្គិភ័យ ដែលធ្វើឲ្យបាត់បង់ទាំងទ្រព្យសម្បត្តិ និងអាចដល់អាយុជីវិត។
ដោយឡែកចំពោះអាជ្ញាធរមូលដ្ឋាន និងកងកម្លាំងមានសមត្ថកិច្ចទាំងអស់ រដ្ឋបាលរាជធានីភ្នំពេញស្នើឲ្យត្រៀមរៀបចំ និងត្រូវរិះរកមធ្យោបាយឲ្យបានគ្រប់គ្រាន់ក្នុងការបង្ការ ទប់ស្កាត់ការកើតមានជាយថាហេតុ នូវអគ្គិភ័យក្នុងមូលដ្ឋានរបស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។