គ្រាន់តែទាស់រឿងជីកដី យកកាំបិតប៉័ងតោដេញកាប់សម្លាប់បងប្អូនឯងស្លាប់២នាក់
ខេត្តសៀមរាប ៖ ដោយសារតែទំនាស់រឿងជីកដីដាក់បង្គោលដើម្បីធ្វើបន្ទប់ទឹកនៅមុខផ្ទះ ជនកំណាចម្នាក់ត្រូវជាបងប្អូនបង្កើត បានយកកាំបិតប៉័ងតោដេញកាប់សម្លាប់បងប្អូនឯងយ៉ាងសាហាវព្រៃផ្សៃ បណ្តាលឲ្យដួលស្លាប់ភ្លាមៗក្នុងថ្លុកឈាម។
ហេតុការណ៍នេះបានកើតឡើងកាលពីវេលាម៉ោងប្រមាណ៥ល្ងាច ថ្ងៃទី២០ ខែមេសា ឆ្នាំ២០១៩ ស្ថិតនៅភូមិដំរីកូន ឃុំពពេល ស្រុកសូត្រនិគម ខេត្តសៀមរាប។
តាមសមត្ថកិច្ចឲ្យដឹងថា ជនរងគ្រោះ ទី១-មានឈ្មោះ វ៉ូ ខឹម ភេទស្រី អាយុ ៤៩ ឆ្នាំ មានទីលំនៅភូមិ-ឃុំកើតហេតុ ត្រូវកាប់ត្រូវថតថ្គាមខាងឆ្វេង ១កាំបិត -កញ្ចឹងក១កាំបិត ជនរងគ្រោះ និងទី២-មានឈ្មោះ វ៉ូ ឃុត ភេទស្រី អាយុ៤២ ឆ្នាំ (ជាប្អូនស្រីបង្កើត)មានទីលំនៅភូមិ.ឃុំកើតហេតុ កាប់ត្រូវចំថ្គាមខាងឆ្វេង២កាំបិត លើត្រចៀក១កាំបិត បំពង់ក១កាំបិត ត្រចៀក១កាំបិត។ រីឯជនសង្ស័យ មាន ឈ្មោះ វ៉ូ វន ភេទប្រុស អាយុ ៤៣ ឆ្នាំ (ប្អូនបង្កើត) ទីលំនៅភូមិ-ឃុំកើតហេតុ។
ដើមហេតុដំបូងមុនពេលកើតហេតុជនសង្ស័យបានជីកដីដាក់បង្គោលធ្វើបន្ទប់ទឹក នៅមុខផ្ទះជនរងគ្រោះហើយជនរងគ្រោះ បានស្ដីបន្ទោស ខណះនោះជនសង្ស័យបានតបតសំដីទៅវិញ មួយសន្ទុះក្រោយមកជនសង្ស័យបានឡើងទៅលើផ្ទះយកកាំបិតប៉័ងតោចុះមកចាប់ជនរងគ្រោះទី១ទាញមកកាប់បណ្តាលឲ្យស្លាប់ភ្លាមតែម្ដង ឃើញដូចនោះ ជនរងគ្រោះទី២ ដែលកំពុងនៅលើផ្ទះ បានស្រែកឲ្យគេជួយ ពេលនោះក៏ត្រូវជនសង្ស័យរត់ទៅដេញកាប់ជាច្រើនកាំបិតរហូតដល់ស្លាប់ភ្លាមៗដែរ។
សូមបញ្ជក់ផងដែរថា តាមការសាកសួរពីសាក្សី កន្លងមកជនសង្ស័យនិងជនរងគ្រោះធ្លាប់មានទំនាស់រឿងដីហើយបានប្ដឹងគ្នាដល់សាលាស្រុក ប៉ុន្តែមិនទាន់ដោះស្រាយចប់នោះទេ ។
បច្ចុប្បន្នសមត្ថកិច្ចកំពុងកសាងសំណុំរឿងបញ្ចូនទៅតុលាការ ឯសាកសពត្រូវបានប្រគល់ឲ្យសាច់ញាតិធ្វើបុណ្យតាមប្រពៃណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។