ជំងឺប៉េស្តជ្រូកអាហ្វ្រិកបន្ដឆ្លងរាលដាលដល់ស្រុកថ្មីមួយទៀតនៃខេត្តរតនគីរី
ខេត្តរតនគីរី៖ យោងតាមសេចក្តីរាយការណ៍បានឲ្យដឹងថា ពេលនេះជំងឺប៉េស្តជ្រូកអាហ្វ្រិក បានផ្ទុះឡើងនិងឆ្លងរាលដាលសម្លាប់ជ្រូកប្រជាកសិករក្នុងស្រុកអូរយ៉ាដាវអស់ជាច្រើនរយក្បាល និងបន្តឆ្លងចូលមកដល់ស្រុកអូរជុំ ហើយបានធ្វើឲ្យជ្រូកប្រជាពលរដ្ឋងាប់ជាង១០០ក្បាលបន្ថែមទៀតនៅអំឡុងចុងខែមេសានេះ។
លោក សយ សូណា ប្រធានមន្ទីរកសិកម្មរុក្ខាប្រម៉ាញ់ និងនេសាទខេត្តរតនគីរី បានឲ្យដឹងថា អាជ្ញាធរខេត្តបានចាត់វិធានការយ៉ាងតឹងរ៉ឹងបំផុត ដោយហាមឃាត់មិនឲ្យមានការដឹកជញ្ជូនសត្វជ្រូកចេញ-ចូលក្នុងដែនដីរដ្ឋបាលខេត្ត គ្រាដែលជំងឺប៉េស្តជ្រូកអាហ្វ្រិក បានសម្លាប់សត្វជ្រូកជាង១០០ក្បាលនៅក្នុងភូមិកាំ ឃុំល្អក ស្រុកអូរជុំ ដែលជាស្រុកទីពីរហើយបានផ្ទុះជំងឺនេះបន្ទាប់ពីស្រុកអូរយ៉ាដាវបានរងនូវជំងឺនេះក្នុងខែមិនា។
លោក សូណា បន្តថា មន្រ្តីជំនាញកំពុងតែធ្វើការសិក្សា តើវាមានផលប៉ះពាល់ដល់សត្វជ្រូកប៉ុន្មានក្បាល និងមានចំនួនប៉ុន្មានភូមិ នៅក្នុងឃុំណាខ្លះ នៃស្រុកអូរជុំ ដែលទទូលរងនូវការឆ្លងមេរោគនេះ។ លោកថា បច្ចុប្បន្ន អាជ្ញាធរខេត្តបានបិទការនាំចេញ-ចូលសត្វជ្រូកទូទាំងខេត្តនិងបានចាត់វិធានការទប់ស្កាត់កុំឲ្យរាលដាលបន្តនៅតាមបណ្តាស្រុកផ្សេងៗទៀត។
ប្រធានមន្ទីររូបនេះ បញ្ជាក់ថា ចំពោះវិធានការទប់ស្កាត់ ខាងមន្ទីរបានដាក់តំបន់ ដែលកំពុងផ្ទុះជំងឺខាងលើ ជាតំបន់ហាមឃាត់ចរាចរសត្វ និងបាញ់ថ្នាំសម្លាប់មេរោគក្នុងភូមិ ព្រមទាំងបានអញ្ជើញប្រជាពលរដ្ឋ ដែលចិញ្ចឹមជ្រូកមកអប់រំផ្សព្វផ្សាយអំពីជំងឺប៉េស្តជ្រូកអាហ្រ្វិក និងផ្សព្វផ្សាយសេចក្តីណែនាំរបស់រដ្ឋបាលតាម វិទ្យុ ទូរទស្សន៍ខេត្ត ជាភាសាខ្មែរ និងជាភាសាជនជាតិដើមភាតិច មានដូចជា ចារ៉ាយ ទំពួន ព្រៅ និងគ្រឹងផងដែរ។
លោកបញ្ជាក់បន្ថែមថា ជំងឺប៉េស្តជ្រូកអាហ្រ្វិកមិនប៉ះពាល់ដល់សុខភាពមនុស្សទេ ដោយជំងឺនេះកើតលើតែសត្វជ្រូកស្រុក និងជ្រូកព្រៃ ដោយសារមេរោគអាចរស់បានរយៈពេលយូរក្នុងសាច់ជ្រូកកែច្នៃ សាច់ជ្រូកសម្ងួត និងសាច់ជ្រូកប្រឡាក់។ លោកថាបច្ចុប្បន្នមិនមានវិធីព្យាបាលជំងឺនេះឲ្យជាសះស្បើយ និងមិនទាន់មានថ្នាំបង្ការ ឬការព្យាបាលណាមួយ ដែលមានប្រសិទ្ធិភាពនៅឡើយទេ ដូច្នេះនៅពេលដែលសត្វជ្រូកឆ្លងជំងឺនេះ វិធានការតែមួយគត់ គឺកម្ទេចហ្វូងជ្រូកដែលទទួលរងផលប៉ះពាល់ចោល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។