ADB ផ្ដល់ឥណទានសម្បទានចំនួន ៧,៦៤ លានដុល្លារមេរិក ជួយកសាងឧទ្យាន ថាមពលពន្លឺព្រះអាទិត្យនៅកម្ពុជា
ធនាគារអភិវឌ្ឍន៍អាស៊ី (ADB) បានអនុម័តឥនទានសម្បទានចំនួន ៧,៦៤លានដុល្លារ អាមេរិក ដើម្បីគាំទ្រដល់ការកសាងឧទ្យានថាមពលពន្លឺព្រះអាទិត្យ កម្លាំង១០០មេហ្គាវ៉ាត់ នៅកម្ពុជាដែលគម្រោងនេះនឹងជួយកម្ពុជាអភិវឌ្ឍន៍ធនធានថាមពលកកើតឡើងវិញ ធ្វើពិពិធកម្មប្រភពថាមពល នឹងពង្រឹងការប្រកួតប្រជែងនៃសេដ្ឋកិច្ចសង្គមរបស់ខ្លួន។ នេះបើយោងតាមសេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី។
គម្រោងឧទ្យានជាតិថាមពលពន្លឺព្រះអាទិត្យ នឹងជួយ (EDC) ដែលជាសេវាផ្គត់ផ្គង់អគ្គិសនីជាតិរបស់កម្ពុជា អាចសាងសង់ឧទ្យានជាតិថាមពលពន្លឺព្រះអាទិត្យ ដែលមានកម្លាំង ១០០មេហ្គាវ៉ាត់ ព្រមទាំងហេដ្ឋារចនាសម្ព័ន្ធពាក់ព័ន្ធដទៃទៀត រួមមានជាអាទិ៍ ផ្លូវចេញចូល របង និងប្រព័ន្ធបង្ហូរទឹក ក្នុងខេត្តកំពង់ឆ្នាំង។ គម្រោងនេះ ក៏នឹងកសាងប្រព័ន្ធបញ្ជូនអគ្គិសនី ដែលតភ្ជាប់ទៅនឹងបណ្ដាញចែកចាយចម្បងនៅក្បែររាជធានីភ្នំពេញ ដែលនឹងអនុញ្ញាតឱ្យគម្រោងនេះអាចផ្គត់ផ្គង់ថាមពលទៅបណ្ដាញចែកចាយជាតិផងដែរ។
សេចក្ដីប្រកាសព័ត៌មានបានឲ្យដឹងទៀតថា បន្ថែមពីលើឥណទានសម្បទានរបស់ ADB កញ្ចប់ហិរញ្ញប្បទានសម្រាប់គម្រោងឧទ្យានជាតិថាមពលពន្លឺព្រះអាទិត្យនេះ ក៏មាន ឥណទានសម្បទានចំនួន ១១លានដុល្លារ និង ៣លានដុល្លារ ជាហិរញ្ញប្បទានឥត សំណងផងដែរ។ ហិរញ្ញប្បទានឥតសំណងនេះ ទទួលបានពីមូលនិធិអាកាសធាតុយុទ្ធសាស្ត្រ តាមរយៈកម្មវិធីពង្រីកថាមពលកកើតឡើងវិញ។
បន្ថែមពីនេះទៀត ក៏មានហិរញ្ញប្បទានឥត សំណងសម្រាប់ជំនួយបច្ចេកទេស ចំនួន ៥០ម៉ឺនដុល្លារ ដែលផ្ដល់ដោយមូលនិធិ e-Asia និងភាពជាដៃគូចំណេះដឹង នៃសាធារណរដ្ឋកូរ៉េ ដើម្បីគាំទ្រដល់ការអភិវឌ្ឍសមត្ថភាព របស់អគ្គិសនីកម្ពុជា (EDC) និងអាជ្ញាធរអគ្គិសនីកម្ពុជា (EAC) ដែលជានិយ័តករអគ្គិសនីជាតិ អំពីបច្ចេកវិទ្យាបម្លែងពន្លឺ ទៅជាថាមពលអគ្គិសនី និងការរៀបចំផែនការឧទ្យានថាមពលពន្លឺព្រះអាទិត្យ។ ADB នឹងគ្រប់គ្រងធនធានទាំងនេះ។ ADB បានជួយរៀបចំគម្រោងឧទ្យានជាតិថាមពលពន្លឺ ព្រះអាទិត្យនេះ ក្រោមហិរញ្ញប្បទានឥតសំណងពីររដ្ឋាភិបាលកាណាដា និងសិង្ហបុរី។
លោក Pradeep Tharakan ប្រធានក្រុមអ្នកឯកទេសខាងផ្នែកការប្រែប្រួលអាកាស ធាតុរបស់ ADB មានប្រសាសន៍ឱ្យដឹងថា « ការមានប្រភពថាមពលដែលគួរឱ្យជឿជាក់បាន មាននិរន្តរភាព និងតម្លៃសមរម្យ មានសារៈសំខាន់ខ្លាំងណាស់ សម្រាប់ការអភិវឌ្ឍសេដ្ឋកិច្ច របស់ប្រទសដែលកំពុងមានការរីកចម្រើនឆាប់រហ័សដូចកម្ពុជា»។ « ជំនួយរបស់ ADB នឹងមិនគ្រាន់តែជួយធ្វើពិពិធកម្មប្រភពថាមពលរបស់កម្ពុជាតាមរយៈការអភិវឌ្ឍថាមពល ព្រះអាទិត្យប៉ុណ្ណោះទេ វាក៏នឹងជួយឱ្យកម្ពុជាសម្រេចបាននូវគោលដៅកាត់បន្ថយឧស្ម័នផ្ទះកញ្ចក់របស់ខ្លួន យោងតាមកិច្ចព្រមព្រៀងស្ដីពីការប្រែប្រួលអាកាសធាតុនៅទីក្រុងប៉ារីសផងដែរ»។
តាមការសិក្សា ADB បង្ហាញឱ្យដឹងថា ប្រទេសកម្ពុជាអាចបន្ថែមថាមពលពន្លឺ ព្រះអាទិត្យប្រមាណ ២០០មេហ្គាវ៉ាត់ ទៅក្នុងបណ្ដាញចែកចាយត្រឹមឆ្នាំ២០២១ ដោយប្រើប្រាស់បច្ចេកវិទ្យាដែលមានស្រាប់ និងដោយមិនប៉ះពាល់ដល់បណ្ដាញចែកចាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។