សមត្ថកិច្ចដេញចាប់ឡានដឹកឈើពាក់ស្លាកលេខ ខ.ម បាញ់ផ្អើលទាំងកណ្តាលយប់នៅខេត្តកោះកុង
កោះកុង៖ រថយន្តព័ណ៍ត្រីអ៊ី ពាក់ស្លាកលេខ ខ.ម ដឹកឈើខ្នាតធំមួយគ្រឿង ត្រូវបានកម្លាំងនគរបាលនៃស្នងការនគរបាលខេត្តកោះកុងតាមប្រមាញ់រហូតដល់មានការផ្ទះអាវុធបណ្តាលឲ្យបែកកង់កាលពីពាក់កណ្តាលអាធ្រាត ឈានចូលថ្ងៃទី២៩ ខែឧសភា ឆ្នាំ2019 នៅម្តុំចំណុចសង្កាត់ស្ទឹងវែង ក្រុងខេមរភូមិន្ទ ខេត្តកោះកុង។
លោកឧត្តមសេនីយទោ សំ ឃីតវៀន ស្នងការនគរបាលខេត្តកោះកុងបានឲ្យដឹងថា នៅវេលាខាងលើ កងកម្លាំងកអន្តរាគមន៍នៃស្នងការដ្ឋាននគរបាលខេត្តកោះកុងបានចេញល្បាត រួចប្រទះឃើញរថយន្តមួយគ្រឿងគួរឲ្យសង្ស័យ កងកម្លាំងក៏ស្ទាក់ឃាត់ តែម្ចាស់រថយន្តមិនព្រមឈប់ក៏បើករត់ ហើយកងកម្លាំងក៏ដេញតាមបណ្តាលឲ្យរថយន្តផ្ទុះកុងក្រោយទៅមុខលែងរួច រីឯម្ចាស់បានដកសោរថយន្តហើយរត់គេចខ្លួន។
ចំពោះព័ត៌មានថា មានការផ្ទុះអាវុធវិញ លោកស្នងការបានមានប្រសាសន៍ថា លោកពុំទាន់បានទទួលរបាយការណ៍លម្អិតនៅឡើយទេ ចំណែករថយន្តសង្ស័យពេលនេះស្ថិតនៅកន្លែងកើតហេតុនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។