លោកដូណាល់ត្រាំប្រកាសថាទីតាំងសាកល្បងបរមាណូ៤កន្លែងរបស់កូរ៉េខាងជេីងត្រូវបានបំផ្លាញ
សហរដ្ឋអាមេរិក ៖ នៅក្នុងកិច្ចប្រជុំនៅសេតវិមាន ប្រធានាធិបតីអាមេរិកដូណាលត្រាំបានបញ្ចាក់ថា “កូរ៉េខាងជើងបានផ្អាកសកម្មភាពដឹកជញ្ជូនមីសីុល ក្នុងនោះមានមីសីុលឆ្លងទ្វីប ព្រមទាំងបានបំផ្លាញទីតាំងសាកល្បងមីសីុលឆ្លងទ្វីប”។ ជាការពិតកូរ៉េខាងជើង បានបំផ្លាញទីតាំងសាកល្បង ធំៗចំនួន៤កន្លែង។ ចំណុចសំខាន់នោះគឺ ដំណើរការលុបបំបាត់បរមាណូកំពុងតែចាប់ផ្តើម។
សកម្មភាពខាងលើគឺជាសញ្ញាបង្ហាញឲ្យឃើញថាទីក្រុងព្យុងយ៉ាង ពិតជាមានបំណងបោះបង់បរមាណូ ដើម្បីទទួលបាននៅសន្តិភាព និងការអភីវឌ្ឍន៍។ ប្រធានាធិបតីអាមេរិក បានឲ្យដឹងថា ទីក្រុងព្យុងយ៉ាងបានចាត់ទុកបរមាណូ គឺជាការស្លាប់រស់ ក្នុងការប្រឈមមុខជាមួយអាមេរិក ប៉ុន្តែមេដឹកនាំ គីម ជុងអ៊ុន បានបញ្ចាក់ថា កូរ៉េខាងជើងនឹងបញ្ចប់កម្មវិធីបរមាណូ ប្រសិនបើសន្តិសុខត្រូវបានធានា ។
កន្លងមករដ្ឋមន្ត្រីការពារជាតិអាមេរិក លោក James Mattis បញ្ចាក់ថា លោកមិនទាន់ទទួលបានព័ត៌មាន ពាក់ព័ន្ធនិងសកម្មភាព ឆ្ពោះទៅរកការលុបបំបាត់បរមាណូ ចាប់តាំងពីជំនួបជាប្រវត្តិសាស្ត្រ នៅថ្ងៃទី១២ខែមិថុនា។ កន្លងមកសារព័ត៌មាន 38 North របស់អាមេរិកបានផ្សាយថា តាមរូបភាពផ្កាយរណប កូរ៉េខាងជើង បានបំផ្លាញ ទីតាំងសាកល្បងកាំជ្រួចមីសីុល នៅជិតទីក្រុង Kusong ភាគខាងជើងប្រទេសនេះ។
សូមជម្រាបថា កន្លងមកអាមេរិកនិងកូរ៉េខាងជើង បានព្រមព្រៀងគ្នា ក្នុងការបញ្ចូនធាតុ ទាហានអាមេរិក នៅក្នុងសង្គ្រាមឧបទ្វីបពីកូរ៉េខាងជើង ទៅកាន់អាមេរិកវិញ នៅពេលឆាប់ៗខាងមុខតាមកិច្ចព្រមព្រៀងប្រទេសទាំងពីរ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។