កម្ពុជាគ្រោងនឹងសាងសង់ចំណតផែកុងតឺន័រទឹកជ្រៅមួយទៀតតម្លៃជាង២រយលានដុល្លារ នៅឆ្នាំ២០១៩
រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ដើម្បីឆ្លើយតបទៅនឹងការកើនឡើងនៃបរិមាណកុងតឺន័រ ឆ្លងកាត់កំពង់ផែ នាពេលបច្ចុប្បន្ន និងនៅពេលអនាគត កំពង់ផែស្វយ័តក្រុងព្រះសីហនុ គ្រោងនឹងពង្រីកសមត្ថភាព របស់កំពង់ផែបន្ថែមទៀត តាមរយៈការកសាងចំណត ផែកុងតឺន័រថ្មីមួយទៀត ដែលមានជម្រៅទឹក១៤,៥ម៉ែត្រ ប្រវែង៣៥០ម៉ែត្រ។
លោក ស៊ុន ចាន់ថុល ថ្លែងថា នៅអំឡុងដំណើរទស្សនកិច្ច របស់សម្តេច ហ៊ុន សែន នាយករដ្ឋមន្ត្រី កាលពីខែសីហា ឆ្នាំ២០១៧ នៅប្រទេសជប៉ុន កំពង់ផែស្វយ័តក្រុងព្រះសីហនុ បានចុះហត្ថលេខា លើពិធីប្តូរសារ និងកិច្ចព្រមព្រៀងប្រាក់កម្ចីសម្បទាន រវាងរដ្ឋាភិបាលកម្ពុជា និងជប៉ុន លើគម្រោងសាងសង់ចំណតផែកុងតឺន័រទឹកជ្រៅនេះ ដោយគ្រោងនឹងសាងសង់ នៅឆ្នាំ២០១៩ ហើយគ្រោងនឹងបញ្ចប់ នៅចុងឆ្នាំ២០២២ ឬដើមឆ្នាំ២០២៣ ដែលមានទឹកប្រាក់សរុប ប្រមាណ២០៣លានដុល្លារអាមេរិក។
លោក ស៊ុន ចាន់ថុល បានឱ្យដឹងដែរថា កំពង់ផែទឹកជ្រៅនេះ នឹងធានាដល់ការចូលចត នាវាកុងតឺន័រខ្នាតធំ ចំណុះ៦ម៉ឺនតោន រហូតដល់៩៣ភាគរយ នៃចំនួននាវាប្រចាំតំបន់អាស៊ី-ប៉ាស៊ីហ្វិក នៅដើមឆ្នាំ២០២៣។ ជាងនេះទៅទៀត កំពង់ផែស្វយ័តក្រុងព្រះសីហនុ នឹងក្លាយជា កំពង់ផែលំដាប់ថ្នាក់កម្រិតមធ្យម ដោយបរិមាណកុងតឺន័រឆ្លងកាត់ នឹងមានបរិមាណលើសពី១លានTEUs ក្នុងមួយឆ្នាំ រីឯតម្លៃដឹកជញ្ជូន តាមផ្លូវសមុទ្រ ទៅមកកម្ពុជា នឹងកាន់តែចុះទាបប្រហាក់ប្រហែល និងថ្លៃដឹកជញ្ជូន តាមសមុទ្រនៃប្រទេសជិតខាង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។