ជប៉ុនផ្តល់ជំនួយជាង១លានដុល្លារសម្រាប់បន្តគម្រោងកែលម្អប្រព័ន្ធធារាសាស្រ្តអាងទន្លេមេគង្គក្រោម
ជប៉ុន ៖ រដ្ឋាភិបាលជប៉ុន បានបញ្ជាក់ឡើងវិញពីការគាំទ្រដល់គម្រោងកែលម្អ ប្រព័ន្ធធារាសាស្រ្តនៅតាមបណ្តាប្រទេសដងទន្លេមេគង្គ ដែលមានប្រទេសកម្ពុជា ឡាវ ថៃ និង វៀតណាម ក្នុងនោះ ទឹកប្រាក់ជាង ១.៤លានដុល្លារអាមេរិក នឹងត្រូវចំណាយសម្រាប់ការអនុវត្តសកម្មភាពការងារនានា ដើម្បីដោះស្រាយបញ្ហាប្រឈមនៃអាងទន្លេមេគង្គ។ នេះបើតាមសេចក្ដីប្រកាសព័ត៌មាន របស់គណៈកម្មការទន្លេមេគង្គ។
ក្នុងសេចក្ដីប្រកាសព័ត៌មាន បានបញ្ជាក់ថា កិច្ចគាំទ្រពីរដ្ឋាភិបាលជប៉ុន សម្រាប់បន្ត គម្រោងកែលម្អប្រព័ន្ធធារាសាស្រ្តនៅតាមបណ្តាប្រទេសដងទន្លេមេគង្គនៃប្រទេសទាំង៤នេះ នឹងអនុវត្តន៍រហូតដល់ឆ្នាំ២០២១ ដើម្បីធ្វើឱ្យប្រសើរឡើង និងមាននិរន្តរភាពនូវប្រភពធន ធានទឹក ផលដំណាំកសិកម្ម ការចរាចររបស់ត្រី និងជីវៈចម្រុះដទៃទៀត។
ការបញ្ជាក់ជំហរជាថ្មីរបស់ពីរដ្ឋាភិបាលជប៉ុន សម្រាប់កិច្ចបន្តគាំទ្រដល់គម្រោងកែ លម្អប្រព័ន្ធធារាសាស្រ្តតាមដងទន្លេមេគង្គនេះ ធ្វើឡើងក្នុងកិច្ចប្រជុំរបស់គណៈកម្មការទន្លេ មេគង្គ នៅទីក្រុងវៀងចន្ទន៍ ប្រទេសឡាវ កាលពីសប្តាហ៍កន្លងទៅនេះ ដែលមានការចូលរួមពី តំណាងជាន់ខ្ពស់របស់ក្រសួងកសិកម្ម រុក្ខាប្រមាញ់ និងនេសាទ នៃប្រទេសជប៉ុន។
លោក ហ្វាម ទួន ផាន (Pham Tuan Phan) អគ្គនាយកនៃគណៈកម្មការទន្លេមេគង្គ បានបញ្ជាក់តាមរយៈសេចក្តីប្រកាសព័ត៌មានរបស់ខ្លួនថា ការគាំទ្រនេះ ស្របទៅតាមផែនការ យុទ្ធសាស្រ្តរបស់គណៈកម្មការទន្លេមេគង្គឆ្នាំ២០១៦-២០២០ សម្រាប់ដោះស្រាយបញ្ហា ប្រឈមសំខាន់ៗក្នុងការប្រើប្រាស់ទឹកនៃអាងទន្លេមេគង្គក្រោម។
លោកបានបន្ដថា ការគាំទ្រពីរដ្ឋាភិបាលជប៉ុននឹងជួយដល់គណៈកម្មការទន្លេមេគង្គ ក្នុងការអនុវត្តផែនការប្រព័ន្ធធារាសាស្ដ្រ និងលើកកម្ពស់ការខិតខំប្រឹងប្រែងក្នុងការលើក កម្ពស់ជីវភាពរស់នៅរបស់ប្រជាពលរដ្ឋ និងកាត់បន្ថយផលប៉ះពាល់បរិស្ថានពីប្រព័ន្ធ ធារាសាស្ត្រនៅក្នុងអាងទន្លេ។ ពិសេសពង្រឹងឱកាសសេដ្ឋកិច្ច តាមរយៈកសិកម្ម និងប្រព័ន្ធ ធារាសាស្រ្តដែលប្រជាជនរាប់លាននាក់ ពឹងផ្អែកលើចំណូល និងប្រភពអាហារ ចម្បងរបស់ពួកគេ។
សូមរម្លឹកថា គម្រោងបន្តជំនួយនេះ ធ្វើឡើងក្រោយពីរដ្ឋាភិបាលជប៉ុន និងគណៈកម្ម ការទន្លេមេគង្គ កាលពីចុងខែកន្លងមកនេះ ចាប់ផ្តើមធ្វើការសិក្សាអំពីការអភិរក្សព្រៃឈើ និងការគ្រប់គ្រងអាងទន្លេមេគង្គក្រោម ដើម្បីគ្រប់គ្រង និងអភិរក្សសុខភាពបរិស្ថាននៃអាងទន្លេ។ ការសិក្សានេះគ្របដណ្តប់លើប្រទេសកម្ពុជា ឡាវ ថៃ វៀតណាម និងមីយ៉ាន់ម៉ា ដែល រំពឹងថា នឹងបញ្ចប់នៅក្នុងខែមីនា ឆ្នាំ២០១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។