អ្នកនាំពាក្យក្រសួងអប់រំ ៖ ការកាត់បន្ថយមុខវិជ្ជាប្រឡង ក្នុងឆ្នាំនេះ ដើម្បីបន្ថយបន្ទុក និងការខ្វល់ខ្វាយរបស់បេក្ខជន
មន្រ្ដីជាន់ខ្ពស់ក្រសួងអប់រំយុវជននិងកីឡាបានលើកឡើងថា ការកាត់បន្ថយមុខវិជ្ជា ប្រឡង សញ្ញាប័ត្រមធ្យមសិក្សាទុតិយភូមិ(បាក់ឌុប) ក្នុងឆ្នាំនេះ គឺដើម្បីកាត់បន្ថយបន្ទុក និងការខ្វល់ ខ្វាយរបស់បេក្ខជនក្នុងការប្រឡងម្តងៗ។
លោក រស់ សុវាចា អ្នកនាំពាក្យក្រសួងអប់រំយុវជន និងកីឡាបានបញ្ជាក់ថា ការកាត់មុខវិជ្ជាប្រឡងសញ្ញាប័ត្រមធ្យមសិក្សាទុតិយភូមិក្នុង ឆ្នាំ២០១៩នេះពីចំនួន១០ មុខវិជ្ជាមកចំនួន៧មុខវិជ្ជា ក្រសួងបានអនុវត្តន៍ចាប់តាំងពីឆ្នាំ២០១៤មក នៅពេលក្រសួងបានចាប់ផ្តើមធ្វើកំណែទម្រង់ប្រឡងមកម្ល៉េះ។ “ការកាត់បន្ថយចំនួនមុខ វិជ្ជា ប្រឡងក្នុងគោលបំណងបន្ថយបន្ទុក និងការខ្វល់ខ្វាយរបស់បេក្ខជនពីការប្រឡងរយៈពេល ២ថ្ងៃកន្លះ មកនៅត្រឹមរយៈពេល២ថ្ងៃ និងពី១០មុខវិជ្ជា មកនៅត្រឹម៧ មុខវិជ្ជា។ ចំណុចនេះ មិនបានធ្វើឱ្យប៉ះពាល់ដល់គុណភាព នៃការសិក្សាទេ ដោយសិស្សទាំងអស់បានពង្រឹងសមត្ថភាពតាមរយៈ ការប្រឡងឆមាសគ្រប់មុខវិជ្ជារួចហើយ។”
លោកបន្ថែមថា ការប្រឡងនេះគឺជាការវិនិច្ឆ័យលើកម្រិតសមត្ថភាព ចំណេះដឹងរបស់បេក្ខជនដោយឈរលើគោលការណ៍ច្បាប់ យុត្តិធម៌ តម្លាភាពនិងលទ្ធផលទទួលយកបាន។
សូមបញ្ជាក់ថា សម័យប្រឡងសញ្ញាប័ត្រមធ្យមសិក្សាទុតិយភូមិ ឬបាក់ឌុបឆ្នាំនេះ នឹងប្រព្រឹត្តទៅនៅថ្ងៃទី១៩-២០ ខែសីហា ឆ្នាំ២០១៩ខាងមុខនេះដែលត្រូវបានក្រសួងអប់រំ បែងចែកជាពីរផ្នែកគឺផ្នែកវិទ្យាសាស្ត្រ និងវិទ្យាសាស្ត្រសង្គម។ សម្រាប់ថ្នាក់វិទ្យាសាស្រ្តសង្គមរួមមានមុខវិជ្ជា ផែនដី និងបរិស្ថានវិទ្យា, ប្រវត្តិវិទ្យា, ភូមិវិទ្យា(ភាសាបរទេស, គណិតវិទ្យា, សីលធម៌ ពលរដ្ឋវិជ្ជា និងអក្សរសាស្ត្រខ្មែរ។ ចំណែកផ្នែកវិទ្យាសាស្ត្ររួមមាន មុខវិជ្ជា ប្រវត្តិវិទ្យា, ជីវវិទ្យា, គីមីវិទ្យា, ភាសាបរទេស, អក្សរសាស្ត្រខ្មែរ, រូបវិទ្យា និងគណិតវិទ្យា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។