ថៃ ស្រីនាង តារាលក់តាមអនឡាញ សម្រេចដកពាក្យបណ្តឹង ប្តឹងគូស្នេហ៍បង្ករហិង្សា
តាមរយៈបណ្តាញសង្គម អ្នកនាង ថៃ ស្រីនាង ដែលគេស្គាល់ថា គឺជាតារាលក់ផលិតផលស៊ិចស៊ីតាមអនឡាញ បានសម្រេចចិត្តដកពាក្យបណ្តឹង ដែលបានប្តឹងគូរស្នេហ៍របស់ខ្លួន ពីការប្រើហិង្សា រហូតដល់ទៅ១៣០ដងនោះហើយ។
ថៃ ស្រីនាង បានសរសេរនៅលើបណ្តាញសង្គមដោយបានសុំអភ័យទោស ចំពោះរឿងរ៉ាវដែលបានកើតឡើងកាលពីថ្ងៃទី៨ ខែកក្កដា ដោយថា មកពីនាងខឹងច្រឡោតពេក ទើបបានផុសរូបក្នុងបណ្តាញសង្គម តែពេលនេះ នាងសម្រេចដកពាក្យបណ្តឹងវិញហើយ ព្រោះតែគូស្នេហ៍របស់នាងបានសុំទោស និងសន្យាថា ឈប់ឲ្យមានរឿងបែបនេះទៀតហើយ, ម្យ៉ាងដោយសារតែរូបនាងមិនចង់ឲ្យគូរស្នេហ៍បាត់បង់កិត្តិយស និងការងារទេ។
ថៃ ស្រីនាង បញ្ជាក់ថា គូរស្នេហ៍របស់នាង គឺជាមនុស្សល្អគ្រប់យ៉ាង គ្រាន់តែចរិត ឆេវឆាវ និងប្រចណ្ឌខុសរឿងតែប៉ុណ្ណោះ។
យ៉ាងណាក៏ដោយ ចំពោះសាររបស់នាងនេះ ក៏ត្រូវបានមហាជននៅលើបណ្តាញសង្គមចូលទៅធ្វើការ Comment ឬបញ្ចេញមតិឌឺដងដល់រូបនាងផងដែរ ដោយមានគណនីមួយបានលើកឡើងថា «រឿងនេះ មិនមែនចេះតែចង់ប្តឹង ក៏ប្តឹង ចង់ដក ក៏ដកនោះទេ ព្រោះសេវាគេទៅដល់បន្ទប់ លឿនណាស់ ហើយរឿងផ្សេងៗទៀត បើសេវាដល់ថ្នាក់ហ្នឹង បទល្មើសស្រុកខ្មែរ អំពើហិង្សានឹងគ្មាន», ជាមួយគ្នាម្ចាស់គណនីរូបនោះ ក៏បានរិះគន់ ថៃ ស្រីនាង ផងដែរ ចំពោះរឿងដែលនាងស្លៀកពាក់រ៉ូបរាត្រី បង្ហោះតាមអនឡាញ ដែលវាបានធ្វើឲ្យបាត់បង់តម្លៃរបស់ស្រ្តីខ្មែរ។
គួររំលឹកដែរថា កាលពីថ្ងៃទី៨ ខែកក្កដា ថៃ ស្រីនាង បានបង្ហោះសារនៅលើបណ្តាញសង្គមរបស់ខ្លួន ដោយសរសេរថា ”លើកនេះទី130 ហើយ ដែលអាថោកទាបនេះវៃខ្ញុំ ស្អែកខ្ញុំនិងឡាយវីដេអូ ឲ្យសមត្ថកិច្ច ចាប់ខ្លួនម្នាក់នេះជាបន្ទាន់ ព្រោះខ្ញុំអស់ភាពអត់ធ្មត់ហើយ សូមមេត្តាជួយខ្ញុំផង”។
ក្រោយការបង្ហោះសារនោះ ថៃ ស្រីនាង ក៏សម្រេចដាក់ពាក្យបណ្តឹងប្តឹងសង្សារបស់នាង ដោយសមត្ថកិច្ចបានមកជួយធ្វើពាក្យបណ្តឹងដល់បន្ទប់ដេករបស់នាងតែម្តង ដោយសារតែនាងអស់កម្លាំងខ្លាំង មិនអាចចេញទៅដាក់ពាក្យបណ្តឹងបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។