អាជ្ញាធរខេត្តសៀមរាបចុះពិនិត្យទីតាំងចាក់សំរាមរបស់ក្រុមហ៊ុន GAEA ក្រោយពីមានបណ្តឹងរបស់ប្រជាពលរដ្ឋ
អាជ្ញាធរខេត្តសៀមរាបកាលពីថ្ងៃម្សិលមិញនេះ បានដឹកនាំក្រុមការងារចុះទៅពិនិត្យទីលានចាក់សំរាម របស់ក្រុមហ៊ុនសំរាម GAEA (ហ្គាអ៊ីយ៉ា) ដែលស្ថិតនៅក្នុងឃុំត្រពាំងធំ ស្រុកប្រាសាទបាគង ខេត្តសៀមរាប ក្រោយពីមានបណ្តឹងរបស់ប្រជាពលរដ្ឋថា ទីតាំងនេះបានធ្វើឲ្យប៉ះពាល់ដល់ការរស់នៅ និងសុខភាពរបស់ពួកគាត់។
លោក ទៀ សីហា អភិបាលរងខេត្ដសៀមរាប ដែលបានចុះទៅពិនិត្យបានមានប្រសាសន៍ថា អាជ្ញាធរនឹងក្រុមហ៊ុនកំពុងរកទីតាំងចាក់សំរាមនៅកន្លែងផ្សេង ដោយទុកពេលរយៈពេល៦ខែទៀត នឹងប្ដូរទីតាំងផ្សេង។
លោកទទួលស្គាល់ថា គំនរសំរាមនេះ គឺពិតជាបានធ្វើឲ្យប៉ះពាល់ដល់សុខភាព និងការរស់នៅរបស់ប្រជាពលរដ្ឋពិតប្រាកដមែន។
យោងតាមអ្នកភូមិថា បច្ចុប្បន្នកុមារជាច្រើននាក់បានកើតជំងឺជាបន្ដបន្ទាប់ ដោយសាររងផលប៉ះពាល់ពីក្លិនស្អុយកាកសំណល់ចេញពីគំនរសំរាម ដែលក្រុមហ៊ុនដឹកយកទៅចាក់ចោលនៅក្បែផ្ទះរបស់ពួកគាត់។ ជាមួគ្នានោះដែរ ទឹកក្វកក៏ហូរចេញពីសំរាមជ្រាបចូលទឹកអណ្ដូងរបស់ពួកគាត់ បណ្ដាលឲ្យប៉ះពាល់ដល់សុខភាពអ្នកភូមិផងដែរ ជាពិសេសទៅទៀតពួកគាត់បានលើកឡើងថា នៅពេលហូបបាយម្ដងៗត្រូវចងមុង ដើម្បីកុំឲ្យរុយរោមទៀត។
យ៉ាងណាក៏ដោយ ចំពោះដំណោះស្រាយរបស់អាជ្ញាធរ ពួកគាត់ខុសចិត្តទុករយៈពេល៦ខែទៀត ដើម្បីឲ្យក្រុមហ៊ុនរកទីតាំងផ្សេងសម្រាប់ចាក់សំរាម តែបើពុំអាចរកដំណោះស្រាយបានទេ ពួកគាត់នឹងកាត់ផ្ដាច់ផ្លូវចូលទៅកន្លែងចាក់សំរាមនោះហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។