Angelina Jolie អាចនឹងត្រៀមខ្លួនធ្វើជាប្រធាន មហោស្រពភាពយន្តអន្តរជាតិ កម្ពុជាជាថ្មី
តារាហូលីវូដ អ្នកស្រី Angelina Jolie អាចនឹងធ្វើជាប្រធានកិត្តិយស មហោស្រពភាពយន្ត អន្តរជាតិ កម្ពុជា ជាថ្មីម្ដងទៀត នាពេលឆាប់ៗ ខាងមុខ។ នេះបើតាមការបញ្ជាក់ ពីលោក ប៉ុក បូរក្ស ប្រធាននាយកដ្ឋាន សិល្បៈភាពយន្ត និងជាតំណាង ឱ្យក្រសួង វប្បធម៌ និងវិចិត្រសិល្បៈ ក្នុងមហោស្រព ភាពយន្តអន្តរជាតិ កម្ពុជា លើកទី៨នេះ។
លោក ប៉ុក បូរក្ស បានឱ្យដឹងថា ៖”ឆ្នាំមុនយើងមានលោកស្រី Angelina Jolie ជាប្រធានកិត្តិយស ក្នុងមហោស្រពនេះ ដោយមានផលិតករ បរទេសជាច្រើន បានអញ្ជើញចូលរួម ព្រោះតែកេរ្តិ៍ឈ្មោះល្បី របស់គាត់។ ដូច្នេះហើយ មហោស្រពភាពយន្ត ឆ្នាំនេះ យើងរំពឹងថា គាត់នឹងគាំទ្រ មហោស្រពនេះ ជាថ្មីម្ដងទៀត”។
សូមបញ្ជាក់ថា រហូតមកទល់នឹងពេលនេះ មានផលិតករ មកពីជុំវិញ ពិភពលោក ប្រមាណជា ៣០ប្រទេស បានចុះឈ្មោះចូលរួម ហើយចំនួននេះ គឺមានប្រហាក់ប្រហែល នឹងឆ្នាំមុន ទាំងមហោស្រពនេះ មិនទាន់បិទបញ្ជី ជាផ្លូវការផង។
មហោស្រពភាពយន្ត អន្តរជាតិ កម្ពុជា លើកទី៨ នឹងរៀបចំ ចាប់ពីថ្ងៃទី៥ ដល់ថ្ងៃទី១១ ខែមីនា ឆ្នាំ២០១៨ ខាងមុខ។ មហោស្រព ភាពយន្ត អន្តរជាតិ កម្ពុជានេះ បានជួយជ្រោមជ្រែងច្រើន ឱ្យវិស័យភាពយន្ត កម្ពុជា ទទួលបានផ្លែផ្កា នាពេលបច្ចុប្បន្ន បន្ទាប់ពីវត្តមាន អ្នកស្រី Angelina Jolie ចូលរួម។ ឆ្នាំនេះមហោស្រព រំពឹងវត្តមាន តារាហូលីវូដ ល្បីឈ្មោះរូបនេះ ចូលរួមជាថ្មី ម្ដងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។