ល្ខោនស្រមោលស្បែកធំនឹងសម្ដែងជូនសាធារណជននៅយប់ថ្ងៃទី២២កុម្ភៈនេះ
សមាគមសិល្បករគោកធ្លក នឹងសម្ដែងល្ខោនស្រមោលស្បែកធំឲ្យសាធារណជនបានទស្សនាដោយសេរី នៅក្នុងទីធ្លាបណ្ណាល័យជាតិ នៅយប់ថ្ងៃទី២២ ខែកុម្ភៈនេះ។
ប្រធានសមាគមសិល្បករគោកធ្លក គឺលោក ភឿង កុម្ភៈ មានប្រសាសន៍ថា នេះជាការសម្ដែងលើកដំបូង បន្ទាប់ពីសមាគមរបស់លោកបានដំឡើងល្ខោនស្បែកធំរឿងរាមកេរ្តិ៍ ចាប់ពីដើមរហូតដល់ចប់ ដោយចំណាយពេលជាច្រើនឆ្នាំមកហើយ។ លោកថា នៅយប់ថ្ងៃពុធ ក្រុមរបស់លោកនឹងសម្ដែងក្នុងរយៈពេល ១ម៉ោង គឺពីម៉ោង ៧ ដល់ម៉ោង ៨យប់ ដោយលើកឈុតឆាកមួយនៃរឿងរាមកេរ្តិ៍ គឺត្រង់ហនុមានសង់ស្ពានទៅក្រុងលង្កា៖ «លើកយកឈុតហនុមានសង់ស្ពានទៅក្រុងលង្កា រហូតដល់ឈុតព្រះលក្ស្មណ៍ សម្លាប់ ឥន្ទ្រជិត ដែលជាបុត្រច្បងរបស់ក្រុងរាពណ៍ ដែលពាក្យឥន្ទ្រជិត ហ្នឹង គឺមានន័យថាខ្លាំងជាងព្រះឥន្ទ្រ ទៅទៀត។ ក្នុងហ្នឹងមានប្រហែល ៦ឆាក គឺត្រូវនឹងមួយម៉ោង»។
លោក ភឿង កុម្ភៈ ឲ្យដឹងថា ដោយសារល្ខោនស្បែកធំអាចសម្ដែងបានតែរឿងរាមកេរ្តិ៍ ទើបសមាគមរបស់លោកបានរួមគ្នាដំឡើងរឿងនេះ ដែលអាចសម្ដែងបានមួយចប់សាច់រឿង ដោយចំណាយពេលសម្ដែងម្ដងជាងបួនម៉ោង។ សមាគមគោកធ្លក បានផ្ដួចផ្ដើមគំនិតនេះនៅក្រោយពេលដែលល្ខោនស្បែកធំត្រូវបានចុះបញ្ជីជាសម្បត្តិបេតិកភណ្ឌអរូបីរបស់មនុស្សជាតិ ដោយអង្គការយូណេស្កូ (UNESCO) កាលពីឆ្នាំ២០០៥។
លោក កុម្ភៈ ឲ្យដឹងថា គោលបំណងនៃការដំឡើងរឿងនេះ គឺចង់ឲ្យល្ខោនស្បែកធំមានឈុតឆាកច្រើនសម្ដែង ដែលពីមុនមានចំនួនតិច និងដោយអន្លើ ពុំមែនជាសាច់រឿងទាំងមូល ម្យ៉ាងលោករំពឹងថា នឹងអាចឲ្យល្ខោនស្បែកធំងើបឡើងវិញមិនបាត់បង់ ហើយថែមទាំងអាចផ្ដល់ការងារជាច្រើនដល់សិល្បករផ្នែកល្ខោនស្បែកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។