លោកជី សិលា CEOរបស់Sabay ៖ អ្នកចង់រកស៊ីត្រូវដឹងថា សម័យនេះមិនមែនត្រីធំស៊ីត្រីតូចទេ តែជាសម័យត្រីលឿនស៊ីត្រីយឺត
លោក ជី សិលា អគ្គនាយកក្រុមហ៊ុន Sabay បានលើកឡើងថា បច្ចុប្បន្ននេះ ម្ចាស់ក្រុមហ៊ុន ឬ សហគ្រិនទាំងឡាយណាដែល ពូកែ និង ដើរទាន់សម័យកាលទើបទទួលបានជោគជ័យ ព្រោះ ពិភពលោកមានការផ្លាស់ប្តូរ និង រីកចម្រើនលឿនណាស់។
កាលពីមុន ក្រុមហ៊ុនតូចៗជាច្រើនត្រូវបានដួលរលំដោយសារតែក្រុមហ៊ុនធំៗ ព្រោះក្រុមហ៊ុនធំមានលុយច្រើន និង ធនធានមនុស្សច្រើន ដូច្នេះហើយប្រកួតប្រជែងមិនឈ្នះនោះឡើយ។ ប៉ុន្តែមកដល់សម័យថ្មីនេះ អ្វីៗគឺមិនដូចមុនទៀតឡើយ ព្រោះដើម្បីអាចឈរជើងនៅលើទីផ្សារ និង បន្តជីវិតអាជីវកម្មបាន មិនមែនពឹងលើតែមាឌតែម្យ៉ាងនោះទេ ប៉ុន្តែពឹងលើភាពវៃឆ្លាត និង រហ័សរហួន ដោយយល់ច្បាស់អំពីការផ្លាស់ប្តូររបស់ពិភពលោក ឬ ដើរទាន់សម័យកាល។
ថ្លែងក្នុងកម្មវិធី«គន្លឹះក្នុងការធ្វើអាជីវកម្មសម័យDigital» កាលពីល្ងាចម្សិលមិញ នៅផាកកាហ្វេ លោកបានអះអាងថា៖ «សម័យនេះមិនមែនត្រីធំស៊ីត្រីតូចទេ តែជាសម័យត្រីលឿនស៊ីត្រីយឺត»។
ការពន្យល់បែបនេះ គឺដោយសារតែបច្ចុប្បន្ននេះមានក្រុមហ៊ុនជាច្រើននៅលើពិភពលោក មិនអាចរីកចម្រើន ឬ កំពុងដួលរំលំ ដោយហេតុថា ដើរយឺតមិនទាន់សម័យកាល ឬមិនទាន់បច្ចេកវិទ្យា។
អគ្គនាយកក្រុមហ៊ុន Sabay រូបនេះ បានផ្តាំទៅអ្នករកស៊ីទាំងអស់ថា ត្រូវតែមានទស្សនវិស័យវែងឆ្ងាយ ហើយក៏បានសង្កត់ធ្ងន់ទៀតថា ធ្វើជាអ្នករកស៊ី ឬ ថៅកែគេមិនមែនសុទ្ធតែមានជីវភាពធូរធានោះឡើយ ព្រោះការរកស៊ីគឺមានការលំបាកណាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។