ប្រជាពលរដ្ឋក្នុងស្រុកស្វាយចេកសំណូមពរដល់រដ្ឋមន្ត្រីក្រសួងរ៉ែនិងថាមពលគួរពិនិត្យឡើងវិញការធ្វើអាជីវកម្មថ្មភ្នំតាដុង
បន្ទាយមានជ័យ ៖ ប្រជាពលរដ្ឋជាច្រេីនគ្រួសាររស់នៅក្នុងភូមិគោកកី និងភូមិមួយចំនួនទៀត ក្នុងឃុំតាផូ ស្រុកស្វាយចេក បានរាយការណ៏ប្រាប់ដល់អ្នកសារព័ត៌មានថា ពួកគាត់មិនចង់ឲ្យក្រុមហ៊ុន គង់ មាន ធ្វើអាជីវកម្មថ្មភ្នំតាដុង ក្នុងមូលដ្ឋានពួកគាត់ឡើយ ព្រោះជាការបំផ្លិចបំផ្លាញសម្បត្តិធម្មជាតិ ដ៏មាន តម្លៃក្នុងមូលដ្ឋានពួកគាត់។
ប្រជាពលរដ្ឋទាំងអស់នោះបន្តទៀតថា ការធ្វើអាជីវកម្មថ្មភ្នំនេះគឺធ្វើឲ្យប៉ះពាល់ដល់ផ្នូរសពដូនតារបស់អ្នកភូមិ ហើយភ្នំនេះក៏ជាទីសក្ការៈបូជារបស់ពលរដ្ឋក្នុងមូលដ្ឋានតាំងពីដូនតាមក។ លេីសពីនោះទៅទៀត ក្រុមប្រជាពលរដ្ឋបញ្ជាក់បន្ថែមទៀតថា មិនគួរណាលោក សួន បវរ អភិបាលខេត្តបន្ទាយមានជ័យ ក៏ដូចជាប្រធានមន្ទីររ៉ែនិងថាមពលខេត្តបន្ទាយមានជ័យ គិតគូរតែរឿងផលប្រយោជន៍ផ្ទាល់ខ្លួនហើយបណ្ដោយឲ្យក្រុមហ៊ុន គង់ មាន មកបំផ្លាញភ្នំតាដុង ជាទីគោរពបួងសួងរបស់ប្រជាពលរដ្ឋឡើយ។
ក្រុមប្រជាពលរដ្ឋដដែលនេះបានអំពាវនាវយ៉ាងទទូចឲ្យលោក ស៊ុយ សែម រដ្ឋមន្ត្រីក្រសួងរ៉ែនិងថាមពល ចាត់វិធានការទប់ស្កាត់កុំឲ្យក្រុមហ៊ុន គង់ មាន បន្តធ្វើអាជីវកម្មថ្មភ្នំតាដុង ហើយពួកគាត់នឹងប្រមូលផ្ដុំគ្នាតវ៉ាបន្តទៅទៀត ហេីយនឹងដាក់លិខិតតវ៉ាឲ្យអាជ្ញាធរស្រុកស្វាយចេក និងអាជ្ញាធរខេត្តបន្ទាយមានជ័យ ចាត់វិធានការទប់ស្កាត់ជាបន្ទាន់។
តាមប្រភពខ្លះបង្ហើបឲ្យដឹងថា ប្រសិនបើគ្មានការឃុបឃិតបើកដៃពីសំណាក់លោក សួន បវរ អភិបាលខេត្តបន្ទាយមានជ័យ ក៏ដូចជាប្រធានមន្ទីររ៉ែនិងថាមពលខេត្តបន្ទាយមានជ័យ ទេនោះគឺក្រុមហ៊ុន គង់ មាន មិនអាចបោះទីតាំងធ្វើអាជីវកម្មថ្មភ្នំនៅក្នុងភូមិគោកកី ឃុំតាផូ ស្រុកស្វាយចេក យ៉ាងគឃ្លើនបែបនេះឡើយ។
មន្ត្រីរាជការនិងប្រជាពលរដ្ឋក្នុងខេត្តបន្ទាយមានជ័យ រិះគន់ថាចាប់តាំងពីលោក សួន បវរ ឡើងកាន់តំណែងជាអភិបាលខេត្តបន្ទាយមានជ័យរួចមក គឺអាជីវកម្មថ្មភ្នំមានសភាពកាន់តែខ្លាំងក្លា ហើយភ្នំមួយចំនួនក្នុងទឹកដីខេត្តមួយនេះ ត្រូវគេកាយដីលក់យកលុយចែកគ្នាធ្វើមានធ្វើបានយ៉ាងសប្បាយតែម្តង៕
លោក សួន បវរ អភិបាលខេត្តបន្ទាយមានជ័យ
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។