គណៈកម្មាធិការជាតិគ្រប់គ្រងគ្រោះមហន្តរាយ បង្ហាញតួលេខពលរដ្ឋរងគ្រោះដោយសារទឹកជំនន់
បើតាមលោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា គិតតាំងពីពាក់កណ្តាលខែកក្កដា មក មានប្រជាពលរដ្ឋចំនួន១ម៉ឺន១ពាន់៩១៧គ្រួសារ រស់នៅក្នុងខេត្ដចំនួន៤ រួមមាន៖ ខេត្ដស្ទឹងត្រែង ក្រចេះ ត្បូងឃ្មុំ និងកំពង់ចាម ត្រូវទឹកជំនន់ជន់លិចលំនៅដ្ឋាន។ ក្នុងនោះប្រជាពលរដ្ឋចំនួន១ពាន់៧៣៣គ្រួសារ ត្រូវបានអាជ្ញាធរ និងសមត្ថកិច្ច ជម្លៀសទៅកាន់ទីទួលសុវត្ថិភាព។
ពាក់ព័ន្ធបញ្ហាទឹកជំនន់នេះ ក្នុងឱកាស ចុះពិនិត្យមើលគ្រោះទឹកជំនន់ក្នុងខេត្តក្រចេះ នៅល្ងាចថ្ងៃទី០២ ខែសីហា ម្សិលមិញ ឯកឧត្តម ញឹម វណ្ណដា អនុប្រធានប្រចាំការគណៈកម្មាធិការជាតិគ្រប់គ្រងគ្រោះមហន្តរាយ បានថ្លែងថា បញ្ហាទឹកជំនន់នេះ យើងបានប្រើប្រាស់នូវវិធានការណ៍សរុប មធ្យោបាយសរុប និងកម្លាំងសរុប ដើម្បីឆ្លើយតបទៅនឹងការ សង្គ្រោះបន្ទាន់ឲ្យបានទាន់ពេលវេលា។
យោងតាមព្រឹត្តិបត្រព័ត៌មាន និងការព្យាករណ៍កម្ពស់ទឹកជំនន់ ចេញផ្សាយនៅថ្ងៃទី៣ សីហា នេះ បានបង្ហាញថា ទឹកទន្លេមេគង្គខេត្តស្ទឹងត្រែង បានស្រកចុះមកហួសកម្រិតប្រកាសឲ្យប្រុងប្រយ័ត្នហើយ គឺ ១០,៤៧ម៉ែត្រ ហើយទន្លេមេគង្គខេត្តក្រចេះបានចុះមកនៅត្រឹម ២១,៧២ម៉ែត្រ តែទឹកទន្លេមេគង្គខេត្តកំពង់ចាម បានឡើងដល់កម្ពស់ ១៥,១២ម៉ែត្រ ហើយទន្លេបាសាក់កោះខែល ឡើងដល់ ៧,៥៧ម៉ែត្រ លើកម្ពស់ប្រកាសឲ្យប្រុងប្រយ័ត្ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។