ពិភាក្សាពាណិជ្ជកម្ម អាមេរិក-ចិន ៖ បើតម្រង់កាំភ្លើងចំក្បាលចឹង អ្នកណាពិភាក្សាបាន?
អន្តរជាតិ ៖ សារព័ត៌មាន Wall Street Journal បានផ្សាយថា រដ្ឋាភិបាលចិន អាចនឹងមិនចូលរួមកិច្ចពិភាក្សា ពាណិជ្ជកម្មជាមួយអាមេរិក ប្រសិនបើរដ្ឋាភិបាលរបស់ប្រធានាធិបតី ដូណាល ត្រាំ បន្ត អនុម័តតម្លើងពន្ធលើទំនិញនាំចូលពីចិននៅក្នុងសប្តាហ៍នេះ។
ប្រភពព័ត៌មានបានឲ្យដឹងថា« ចិននិងមិនពិភាក្សា នៅពេលដែលកាំភ្លើងកំពុងតម្រង់លើក្បាលរបស់ខ្លួននោះ»។ ជាមួយគ្នានោះអាមេរិក បានស្នើរពិភាក្សា ជាមួយចិន ប៉ុន្តែអាមេរិកក៏បាន ប្រកាសតម្លើងពន្ធ បន្ថែមលើទំនិញចិនមានតម្លៃ ជាង ២០០ពាន់លានដុល្លារ អាមេរិក។
សារព័ត៌មាន Business Insider បានផ្សាយថា «រដ្ឋាភិបាលចិន នឹងមិនចូលរួមកិច្ចពិភាក្សាពាណិជ្ជកម្ម ជាមួយអាមេរិកឡើយ នៅពេលដែលរដ្ឋាភិបាលលោកត្រាំ នៅតែបន្តអនុម័ត តម្លើងពន្ធ លើទំនិញចិន»។
ប្រភពព័ត៌មានបានឲ្យដឹងថាមន្ត្រីជាន់ខ្ពស់ចិនបានស្នើរដល់មេដឹកនាំរបស់ខ្លួន កាត់បន្ថយទំនិញអាមេរិក ក៏ដូចជាកាត់បន្ថយការនាំចេញទៅកាន់អាមេរិក ដើម្បីជាការគំរាមដល់កង្វះប្រភពផ្គត់ផ្គង់នូវទំនិញចាំបាច់មួយចំនួន។
កន្លងមក រដ្ឋមន្ត្រីហិរញ្ញវត្ថុអាមេរិក លោក Steven Mnuchin បានស្នើរ បើកកិច្ចពិភាក្សាពាណិជ្ជកម្ម ជាមួយចិននៅថ្ងៃទី ២០ខែកញ្ញា ហើយចិនក៏បាន យល់ព្រមចូលរួមផងដែរ។
ប្រធានាធិបតីអាមេរិកលោក ដូណាល ត្រាំ បានប្រកាសពីគម្រោងតម្លើងពន្ធ មានទឹកប្រាក់ប្រមាណ២០០ពាន់លានដុល្លារ ដែលនឹងអនុម័តនៅថ្ងៃទី១៧ ខែកញ្ញានេះ ។ សារព័ត៌មាន Wall Treet Journal បានផ្សាយថា អាមេរិកបានតម្លើងពន្ធ ១០ភាគរយ គឺទាបជាង ២៥ភាគរយ ដែលរដ្ឋាភិបាលអាមេរិក បានតម្លើងនាពេលកន្លងមក។
អាមេរិកបានតម្លើងពន្ធ ៥០ពាន់លានដុល្លារលើទំនិញចិន ក្រោយស្រាវជ្រាវលើទំនិញនាំចូល។ ជាមួយគ្នានេះ អាមេរិកបានឡើងគម្រោងតម្លើងពន្ធ ២០០ពាន់លានដុល្លារ និង២៦៧ពាន់លានដុល្លារ បន្ថែមទៀត សរុបគម្រោងរបស់អាមេរិក តម្លើងពន្ធលើទំនិញចិនមានរហូតដល់ជាង ៥០០ពាន់លានដុល្លារអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។