អភិបាលស្រុក​អន្លង់វែង និង​នាយក​រដ្ឋបាល​របស់ខ្លួន រង​ការ​ចោទ​ពី​ពលរដ្ឋ​ថា បាន​យក​ដី​ពលរដ្ឋ និង​ដី​របស់​រដ្ឋ​លក់​អស់​៥០​ហិច​តា​

​ខេត្តឧត្ដរមានជ័យ​៖ កាលពីពេល​ថ្មីៗ​នេះ​មាន​សេចក្ដីរាយការណ៍​មក​ថា លោក ហោ ជិន​វីរ​:​យុទ្ធ អភិបាលស្រុក​អន្លង់វែង បាន​ឃុបឃិត​គ្នា​ជាមួយ​លោក ងួន លីន នាយក​រដ្ឋបាល​សាលាស្រុក បាន​យក​ដី​របស់​ប្រជាពលរដ្ឋ​និង​ដី​របស់​រដ្ឋ ចំនួន​៥០​ហិកតា​នៅ​ចំណុច​អូ​សា​ភី ស្ថិតនៅ​ភូមិ​លំ​ទង​ចាស់ ឃុំ​លំ​ទង ស្រុក​អន្លង់វែង​ខេត្តឧត្ដរមានជ័យ ។​

​ឈ្មួញ​ទិញ​ដី​ពីរ​នាក់​ប្ដី​ប្រពន្ធ​នៅ​ចំណុច​ខាងលើ​បាន​លើកឡើងថា ពួកគាត់​មកពី​ខេត្តកំពង់ចាម មក​ទិញ​ដី​នៅទីនេះ​ចំនួន​៥០​ហិច​តា នៅ​ខែ​៧ និង​ខែ​៨​ថ្មីៗ​នេះ ពី​លោក ហោ ជិន​វីរ​:​យុទ្ធ អភិបាលស្រុក​អន្លង់វែង និង​លោក ងួន លីន នាយក​រដ្ឋបាល​សាលាស្រុក ដោយ​ពួកគាត់​ទិញ​ដី​នេះ​ដើម្បី​ប្រកប​របរ​កសិកម្ម​ខ្លួនឯង ព្រោះ​លក់​ធូ​ថ្លៃ​។​

​ប្រជាពលរដ្ឋ​បាន​លើកឡើងថា ពួកគាត់​ត្រូវបាន​លោក ងួន លីន យក​ដីស្រែ​ចំការ​ពួកគាត់​លក់​អស់ ដោយ​ពួកគាត់​មិនបាន​រំពឹង​អ្វី​ទៀតឡើយ នៅពេលដែល​ពួកលោក​មានអំណាច​ខាងលើ​ដាក់​គ្រឿងចក្រ​ឈូសឆាយ ពួកគាត់​បានដាក់​ពាក្យ​សុំ​អន្តរាគមន៍​ទៅ​គណ​:​ពង្រឹង​គឺ​លោក​ឧត្ដមសេនីយ៍ទោ នាង ឃីម មេបញ្ជាការ​កងពលតូច​លេខ​៤១ និង​ដាក់​ទៅ​សាលាឃុំ​លំ​ទង តែ​រហូតមកទល់​និង​ពេលនេះ​ជាង​មួយខែ​ហើយ​គ្មាន​ន​ណា​ជួយ​ពួកគាត់​បានឡើយ ។​

​ហេតុនេះ​ពួកគាត់​សូម​អំពាវនាវ​ដល់​ប្រមុខ​រាជរដ្ឋាភិបាល​សម្ដេច​តេ​ជោ ហ៊ុន សែន ជួយ​ពួកគាត់​ផង​។​

​ទាក់ទង​និង​ការចោទប្រកាន់​ពី​ប្រជាពលរដ្ឋ​ខាងលើ លោក ហោ ជិន​វីរ​:​យុទ្ធ បាន​ឲ្យ​ដឹង​តាម​ទូរស័ព្ទ​ថា រឿងនេះ​ជាការ​មួលបង្កាច់​របស់​ប្រជាពលរដ្ឋ លោក​មិនមាន​ដី​លក់​ទេ តែ​ក្នុងនាម​លោក​ជា​អ្នកសម្របសម្រួល ហើយ​រឿងនេះ​ខាង​ឃុំ​កំពុង​ស្វែងរក​ការសម្របសម្រួល​ក្រោយ​វេទិការ​សារ​ធា​រណ​:​រួច ។​

​លោក ងួន លីន នាយក​រដ្ឋបាល​សាលាស្រុក​អន្លង់វែង បាន​ឲ្យ​ដឹងថា លោក​និង​ប្ដឹង​ប្រជាពលរដ្ឋ​វិញ ព្រោះ​ដី​នេះ​ពលរដ្ឋ​មិន​មានការ​អាស្រ័យ​ផល​ជាក់ស្ដែង​និង​ប​ណ្ណ័​កម្ម​សិទ្ធ​កាន់កាប់​ឡើយ​៕

​អត្ថបទ​៖ ឆា​នុ​ន​

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

Close